Wardacosta Hulandes di Caribe (DCCG) a intercepta un sailboat flotando cerca di St. Kitts siman pasa, cu tabatin 35 migrante ilegal a bordo.
Durante un patruya, e aeronave Dash 8 a mira un sailboat cu tabatin un grupo di persona a bordo ta zwaai nan man desespera na e avion.
Figurando cu e personanan aki tabatin mester di asistencia, e Centro di Rescate y Coordinacion inmediatamente a manda e cutter di DCCG, Poema, na e sailboat. E Centro di Rescate y Coordinacion Maritimo na Fort-de-France, Martinique, tambe a ser informa di e operacion.
Personal di DCCG a haya 35 persona a bordo di e sailboat, incluyendo dos muhe na estado y un cantidad no revela di mucha. “E grupo tabata un grupo di inmigrante ilegal na caminda pa un destino desconoci”, DCCG a bisa den un comunicado di prensa.
Pa motibo di problema cu motor cual e capitan y otro personanan no por a drecha, e barco a keda flota riba lama.
Poema a hiba e boto deshabilita na e isla mas cercano, St. Kitts. Tur persona a bordo, incluyendo e capitan, a ser entrega na autoridad di St. Kitts and Nevis, pa mas investigacion, segun DCCG a bisa diadomingo.
