Wardacosta di Libia ta recupera basta curpa di migrante

Wardacosta di Libia a recupera un cantidad halto di curpa di migrante bayendo rumbo pa Europa, kendenan a fayece riba lama mientras operacionnan di rescate a continua riba diabierna. Esaki ta despues cu mas o menos 150 persona a disparce na lama ora cu nan boto a bolter den Oceano Mediteraneo.

E agencia contra inmigracion ilegal den e capital di Libia a bisa cu, mas o menos 350 migrantenan tabata riba botonan cu a bolter cerca Khoms, 120 kilometer leu di Tripoli. E migrantenan tabata inclui personanan di Eritrea, Egipto, Sudan y Libia, segun e agencia. Autoridadnan di Libia a declara cu mas cu 130 a keda rescata desde diahuebs.

Un di e sobrevivientenan di Eritrea a bisa cu su boto a cuminsa bolter despues di un ora di nabegacion. Mayoria di persona riba e botonan tabata hende muhe, y mayoria a hoga, el a bisa. ‘Tur esunnan cu a hoga tabata hende muhe… djis 2 mucha muhe a logra salba nan mes’, el a bisa, papiando bou anonimidad pa via cu e tin miedo pa su siguridad.

Dos otro persona cu a logra sobrevivi, a bisa Associated Press via telefon cu cada un a paga entre 200 pa 400 dollar na traficantenan kendenan a priminti cu nan lo yega Italia pa diahuebs atardi.