WILLEMSTAD – Ayera tardi e Centro di Rescate y Coordinacion di Wardacosta a ricibi un yamada di auxilio riba e canal VHF 16, caminda cu e capitan di e boto piscado ‘Father Gomez’ a indica cu nan boto tabata sink.
Mesora Centro di Rescate a lansa e helicopter di Wardacosta pa localisa e boto. E tripulacion, consistiendo di 4 hende homber local, tabata rumbo pa Aves na momento cu nan boto a cuminsa sink bay fondo di lama. Na e momento ey nan tabata na parti nort di Klein Curaçao.
Na momento cu e helicopter a yega na e localidad indica, e tripulantenan a mira solamente e cabes di e boto den awa. Nan a bin haya e 4 personanan despues di un rato na un distancia di mas o menos 1 kilometer for di e boto. Tur e persona, cu nan jacket di salbabida bisti, a ser di lanta for di awa dor di e helicopter. Nan tur tabata sano y salvo y por a regresa nan cas.
