Wardacosta, trahando den conhunto cu polis, a intercepta un barco for di Venezuela. Autoridadnan a haya tres Venezolano abordo y un cantidad di droga, segun un relato di portal online Aruba.nu.
Operadornan di radar a duna señal pa alrededor di un or di marduga cu tabatin un boto biniendo Aruba for di Venezuela. A activa un helicopter y cu esaki a cuminsa un persecucion pa motibo cu e boto a nenga di stop, sino cu a purba di cambia su rumbo y bay back Venezuela.
Sinembargo, net prome cu e barco a alcansa e awanan teritorial di Venezuela, wardacosta a logra para e barco, pa alrededor di 5:30. Riba e boto a detene tres pasahero, di cual un tabata e capitan y e otro dos tabata tripulacion. Den e boto tabatin un pallet cu droga. Wardacosta a trece tanto e droga como e tres sospechoso y a entrega esakinan na e Unidad di Crimen Organisa di Polis di Aruba pa continua cu e investigacion.
Pa motibo di e peliger presenta pa un cantidad asina grandi di droga, a tuma e decision pa trece aden e Arrestatieteam pa asina coordina e transporte di e droga. Agentenan di polis cu arma a lidera e transporte, dilanti y patras di e pick-up den cual tabata transporta e carga.
A warda e droganan mesora na e Centro di Detencion na Macuarima , unda a pisa y registra nan mainta trempan. Ainda no a comunica e resultado di e proceso aki.
