Warda nos Costa mester haci su trabou di un manera mas reserva

ORANJESTAD – Via rednan social par di dia pasa a ser conoci e caso di autoridadnan di Warda nos Costa, cu a drenta na un luga comercial hopi turistico y a causa miedo riba tur e turistanan y empleadonan di e luga.

E situacion tabata trata ora nan a drenta na e luga ey, cu tabata full di turistanan, y nan a cuminsa intimida e cashier cu tabata haci su trabou. Warda Nos Costa a puntra pa e permiso di tur e trahadonan, pero na e momentonan ey, e incidente a causa confusion cerca tur persona cu tabata den e luga, pa via di e actitud di e agentenan di Warda nos Costa.

Bon Dia Aruba a tuma contacto cu e manager, cu tin nuebe aña trahando na e luga hopi conoci pa via di su ijs cream, y el a splica cu kier keda anonimo pa evita represalia contra su persona.

El a splica cu normalmente nan ta un compania cu tin hopi cliente, mas o menos un siman pasa den oranan di anochi pa casi 9or, e luga tabata ful di clientenan y el a aprecia di nan cu tur tabata spanta y trabou tabata para, manera el a bisa, ‘tur cos a bira un locura’.

Un di su empleadonan a bisa cu Warda nos Costa kier pa nan stop di traha, pa motibo cu nan lo kier wak e permiso di tur e trahadonan. “Esey ta un cos cu mi a wak cu no ta logico”, e manager a expresa, pa motibo cu e luga tabatin hopi turista, locual ta mal bisto pa motibo cu Aruba ta biba di turismo.

“Nan no por bin pa spanta e empleadonan y pone nan stop di traha pa pidi documentonan. Prome nan mester bin cerca gerente of manager, pa e lo por mustra e documentonan, pa asina e empleadonan por sigui cu nan trabou”.

Tambe el a referi na dos empleado cu Warda nos Costa kier a hiba nan, pa motibo cu un di nan a lubida su documento na cas, y e otro, cu ta un señora na estado, tabatin e documento na oficina. Despues el a splica cu e señora na estado a bira malo y nervioso pa via di e incidente.

Warda nos Costa, como autoridad, mester cambia un tiki e sistema, pa motibo cu e turista no mester wak e panorama ey. “Nan mester haci nan trabou ora ta trata cu area turistico di un manera mas reserva”, manager di e luga a comenta.