Walmart a bisa diahuebs cu por join Microsoft pa cumpra e negoshi Mericano di TikTok, e app popular di video propiedad Chines cu a ricibi critica di administracion di Trump.

Microsoft y TikTok a nenga di duna comentario.

TikTok, a traves di su videonan dibertido, a haya centenares di miyones di usuario globalmente. Pero Cas Blanco ta pushando doño Chines di TikTok, ByteDance pa bende su negoshi Mericano si kier sigui opera den e pais, citando riesgo pa siguridad.

Walmart a bisa den un declaracion cu un acuerdo cu Microsoft y TikTok lo por yud’e expande su negoshi di aviso y yega na mas cumprado.

Administracion di Trump ta forsando e benta di operacion Mericano di TikTok pa via di su doño Chines, y a menasa di prohibi e app, cu TikTok ta bisa ya tin 100 miyon usuario Mericano. TikTok a demanda pa stop e prohibicion, pero no e orden di benta. Microsoft a confirma negociacionnan cu TikTok; otro companianan tecnologico manera Oracle tambe ta supuestamente interesa den un posibel adkisicion.

Durante ultimo aña, TikTok a purba di pone distancia entre su app y e doñonan Chines. A instala ex-ehecutivo top di Disney, Kevin Mayer como su CEO na Merca, pero el a renuncia diahuebs despues di apenas algun luna den e funcion.

Den un carta na empleadonan, Mayer a bisa cu su decision pa retira ta bin despues cu ‘ambiente politico a cambia fuertemente’.

ByteDance a lansa TikTok na 2017, despues a cumpra Musical.ly, un servicio di video popular cu adolescentenan na Merca y Europa, y a combina nan dos. Un servicio morocho, Douyin, ta disponibel pa usuarionan Chines.

Autoridadnan Mericano ta preocupa cu TikTok lo entrega data di usuarionan na autoridadnan Chines y cu ta censura contenido cu lo disgusta China. TikTok ta nenga cu a comparti data di usuario cu gobierno Chines, bisando cu no lo haci esaki si ricibi solicitud, ni videonan censura riba peticion di autoridadnan Chines, y ta bisa cu no ta un menasa pa siguridad nacional.

E situacion di e benta ta inusual, cu presidente Donald Trump exigiendo pago pa gobierno Mericano pa su rol den orkestra un acuerdo, un stap cu expertonan ta bisa ta sin precedente. E presidente a bisa dia 18 di augustus cu Oracle tabata un ‘tremendo compania’ cu por ‘handle’ e compra di TikTok. El a nenga di bisa su preferencia entre Oracle y Microsoft como cumprado.

Microsoft y Walmart ya ta partner comercial, cu Microsoft proveyendo servicio di computer cu ta yuda maneha e tiendanan y shopping online di Walmart. Ambos compania a firma un partnership di cinco aña na 2018, permitiendo nan pa join forsa conta nan rival, Amazon.