Durante un conferencia di prensa, Fundacion Arubano di esnan Visualmente Incapacita (FAVI) a anuncia cu e aña aki nan famoso caminata “Walk with a Vision” t’ey. Charlene Marchena y Sary Wernet a splica un poco mas tocante e detayenan di e caminata, su historia y e meta principal tras di esaki.
Manera Marchena a splica, e caminata “Walk with a Vision” a keda para pa dos aña despues cu e pandemia di COVID-19 a yega Aruba y despues di dos aña, e caminata t’ey un biaha mas y cu un ruta nobo. E aña aki “Walk with a Vision” ta sali for di Alhambra, ta bay direccion Divi Phoenix hotel, canando ariba e walk-path di Eagle Beach y lo regresa back Alhambra caminda e ta termina.
E caminata “Walk with a Vision” lo tuma luga ariba diadomingo 27 di maart. Registracion ta cuminsa 4or di atardi y caminata lo sali for di e punto di salida 5or di atardi. Marchena a menciona tambe cu e ticket di cada participante ta bay den un tombola pa oportunidad pa gana un premio special.
Durante e caminata e trahado- y boluntarionan di FAVI lo t’ey pa sostene e caminata y hunto cu Rode Kruis nan lo garantisa e seguridad di e participantenan.
Sra. Wernet-Kelly a conta un poco mas ariba e historia di e caminata, e meta y e significado di e nomber “Walk with a Vision”. Na prome el a gradici tur persona cu di un of otro forma a contribui pa ta parti di e caminata aki.
El a sigui conta cu “Walk with a Vision” a cuminsa nuebe aña pasa y tin como meta principal pa stimula movemento bao di e clientenan di FAVI, pasobra na cuminsamento e clientenan tabatin miedo pa participa na caminatanan publico. “Na e momento ey nos di FAVI a bisa ban traha un caminata unda nos por stimula y siña nos clientenan con nan tambe por participa na un caminata publico sin tene miedo cu hendenan no lo tene cuenta cu nan”, el a agrega.
Durante añanan e caminata a haya su popularidad bao di e clientenan di FAVI mes. Na principio e famianan di e clientenan a cuminsa cu e caminata manera un grupo masha chikito. Wernet-Kelly a recorda cu pa nan prome caminata nan tabatin 100/150 persona participando y pa e ultimo caminata na aña 2019 nan tabatin alrededor di 500 persona cu a participa. “Nos expectativa pa e aña aki ta grandi, nos ta spera un publico grandi atrobe”, el a bisa.
“Walk with a Vision ta significa cana cu un vision, un vision den bida, un vision pa logra bo metanan y muy specialmente pa nos clientenan cu tin un limitacion visual. Pero e por conta pa cualkier parti di comunidad cu kisas ta mira ainda cu wowo solamente, pero ta lubida di mira e parti di expectativanan di pone metanan den bida”, Wernet-Kelly a subraya.
El a enfatisa cu esey ta e curason di e caminata y e motibo pakico ta importante pa nan continua cune, pa asina nan por hiba e mensahe aki den comunidad y pa tur persona cu tin un of otro limitacion visual tambe por uni nan. Y tambe el a remarca cu pa tur persona cu kisas no a logra nan meta di movemento deportivo of cualkier meta cu ta, e caminata aki por bira un empuhe pa nan.
Marchena a enfatisa tambe cu ticketnan ta limita. El indica cu e aña aki nan a pone un limite di 1000 participante y segun el a menciona durante e conferencia di prensa, a resta alrededor di 50 ticket solamente.
Na aña 1974 un grupo di persona hopi entusiasma, bao di guia di Hulanda, a wordo stimula pa lanta “Stichting Blindzorg Aruba”. Na aña 1975 a cambia e nomber pa Fundacion Arubano di esnan Visualmente Incapacita, abrevia FAVI y asina wordo reconoci facilmente den comunidad. E nomber FAVI awendia ta wordo asocia inmediatamente cu personanan cu limitacion visual.
FAVI su meta ta pa yuda y guia e personanan cu ta ciego y cu tin limitacion di bista, cu e obhetivo pa contribui na nan alegria di bida. Cu alegria di bida FAVI kiermen: saca e persona for di su isolacion pa e por biba un bida mas alegre, pa nan tin contacto social y pa bida por tin sentido. Pa por logra esaki, FAVI ta conta cu un team hopi dinamico, creativo, innovativo y educativo.
