Mescos cu henter Aruba, nos tambe ta den shock. Esaki ta e tipo di noticia cu nos semper ta spera di nunca mester reporta. Regularmente den nos region y den resto di mundo ta sucede cosnan di un crueldad indescribibel, no solamente di desconoci contra persona inocente, pero tambe den famia, manera den e caso aki. Pero semper nos ta spera cu e tipo di cos aki no ta toca nos comunidad. Nos tabata kiboca. El a sucede caba y por sucede atrobe.

E motibo principal pakico e suceso tristo aki tin nos tur den su gara, ta e contradiccion cu esunnan cu mester a duna e criatura tur cariño y proteccion riba cual e tabatin derecho, ta esunnan cu a perpetra e crimen infame aki. Y pa colmo no ta duna cooperacion pa haya localisa e ruman chikito di ken e paradero ta desconoci. Otro capitulo tristo na e historia aki cu ainda tin un final incierto.

A pesar di tur sentimento, di incomprension, rabia y tristesa pa loke e pober mucha aki mester a soporta, nos tin e obligacion di yega na e fondo di e caso, sin sensacionalismo, pero pa sikiera nos siña colectivamente kico a bay robes. Den e dianan aki nos ta mira mas di un reaccion den medionan di comunicacion, sigur riba rednan social, den sentido di ‘nos a faya’. Un reaccion logico pa motibo di e impotencia cu mayoria di nos ta sinti ora algo asina ta un hecho caba. Niun di nos por draai e oloshi pa e otro banda y cuanto un castigo esunnan responsabel por haya, esey no ta duna e mucha aki su bida atrobe.

Pero, si nos ta sinti cu como comunidad nos a faya, lo menos cu nos por haci ta analisa unda a faya, y con pa trata preveni e tipo di desviacion aki den comportamento humano. E prome pregunta ta, ki tipo di sociedad nos ta, unda e sorto di conducta totalmente inhumano por tuma luga, sin cu na algun momento ta detecta esaki. Y no solamente detecta, sino interveni na un manera eficaz. Ademas, segun e prome indicacionnan, abuso di droga por a hunga un papel den e manera cu esunnan encarga cu cuido di e criaturanan a yega na un conducta asina abominabel. Autoridadnan tabata na altura caba cu e famia tabata disfuncional, pa motibo di droga tambe? O por ta cu cierto cantidad di e casonan aki ta pasa sin detecta? Preguntanan cu lo mester haya contesta ainda.

Un comentario scucha ta cu anteriormente e cosnan aki no tabata sucede den nos comunidad. Mester tene cierto cautela cu e ponencia aki. Esunnan di mas edad entre nos por sa cu maltrato severo den seno familiar tabata sucede cincuenta aña pasa tambe. Loke si ta berdad cu e control social tabata mas grandi, pa motibo cu famianan tabata biba mas cerca otro den mesun vecindario. Esey ta conta pa e comunidad tradicional, pero mester tene cuenta cu pa hopi decada caba nos comunidad ta influencia pa inmigracion fuerte, cu consecuencia cu e lasonan dentro di practicamente cada bario a bira mas los, y e contactonan entre bisiña a cambia di caracter. Esey no tin consecuencia solamente pa e manera cu un mayor ta trata su yiu den seno familiar, pero pa otro asunto tambe, manera delincuencia di adolescente. Un gran mayoria di nos poblacion awendia no sa, y tin ora no kier sa tampoco, den kico nan bisiña ta hinca.

En todo caso, e comunidad cera di antaño no t’ey mas y lo no bolbe tampoco. Nos lo mester haci algo otro si nos ta desea di mehora e situacion actual, unda nos tur ta mas preocupa pa con gana placa, na luga di tin atencion pa e cosnan cu ta bay robes den comunidad. Naturalmente hopi di nos ta haci un apelacion pa accion di esun cu ta actua na nomber di nos tur, esta gobierno. Y ta berdad cu aki tin un punto central di responsabilidad, pa cual no por sconde. Anto ta absolutamente necesario tira un bista critico riba loke na nos nomber ta sucede actualmente na combati e situacion, for di cual por surgi echonan asina grave di aberacion violento contra criatura, cu mester haya proteccion na luga di tortura. Y nos por mira aki cu nos mester por mehora e vigilancia, entre otro na e scolnan, mediante introduccion di trahado social na scol, banda di esunnan den bario, un punto clave den e acuerdo di gobernacion vigente.

Pero lo ta demasiado facil pa djis reduci e asunto na un responsabilidad cu gobierno lo mester haci pa nos. Mayor atencion, mas vigilancia, sin mete innecesariamente den bida di otro, ta algo cu nos tur tin un tarea aden. ‘It takes a community to raise child’, ta un conocido expresion cu sigur tin su balor. Y den e cuido ey nos mester mira tambe e vigilancia pa percura cu cada mucha ta lanta y prospera den un ambiente sigur. Hopi hende, e mayoria, cu no tabata conoce e victima aki, ta sinti dolor, y culpa, cu nos no a brind’e esey. Nos ta na tempo ainda pa salba e otronan