Waf di carga na Barcadera ta inicia un era nobo na Aruba

Segun palabranan di presidente di hunta di directiva di Aruba Ports Authority N.V , Louis Posner ; ”E waf nobo na barcadera ta comienso di un era nobo na Aruba”. Ultimamente tin varios trabao tumando luga na Oranjestad y Barcadera pa locual ta movecion, renobacion y adaptacion di diferente sistemanan nobo.
Siguiente por lesa un relato cu a wordo manda prensa pa locual ta e informacionnan di mas reciente di e waf nobo na Barcadera y con esaki segun sr.Posner ta algo historico pa Aruba den diferente aspecto:

Posner ta felicita pueblo di Aruba pasobra e waf di carga nobo na Barcadera ta un proyecto cu henter e isla mester ta hopi orguyoso di dje. Manera ta conoci, e plannan pa e mudamento di waf di carga tabata riba mesa di varios Gobierno durante ultimo decadanan.
Sr. Posner a confirma e ponencia cu e funcionamento di waf nobo di carga ta habri un mundo di oportunidadnan nobo. Ta oportunidadnan cu, te hasta prome cu e apertura oficial, a cuminsa manifesta nan mes. Un ehempel ta e cooperacion cu a establece cu Port of Amsterdam y e intencion pa haci di Barcadera un hub entre Europa y Latino America.
 

Di otro banda, segun e President di Hunta Directiva di APA N.V., tin e aspecto di e espacio cu awo a keda habri na Oranjestad. “E simpel hecho cu nos a separa e containerhaven di e cruiseship haven ta bay trece desaroyo nobo.”Esey ta e siguiente obhetivo di Aruba Ports Authority, segun Posner. “Ta bay enfoca riba e waf di Oranjestad caminda tin un tereno hopi grandi cu ta bay desaroya y esey ta trece hopi oportunidad.” A duna di conoce cu ya caba ta combersando cu diferente partido y pronto lo cuminsa wak movecion den e area aki.