Wack 100 ta revela existencia di un segundo grabacion di Kim Kardashian y Ray J su famoso ‘sex tape’

(TMZ) – Wack 100 ta bisa cu e tin un grabacion di Kim Kardashian y su ex-pareha Ray J teniendo relacion sexual cu no a ser mira antes, y ta ofreciendo esaki na Kanye West.

Ray J su manager anterior a haci e revelacion aki na Bootleg Kev su programa anteriormente e siman aki, bisando cu tin un di dos parti di e video famoso cu a genera Kim su fama na aña 2000. E no ta cla si esaki ta un continuacion di e prome video, of uno completamente diferente.

Den cualkier caso, Wack ta bisa cu e ta mas largo y mas grafico, den un laptop cu ta warda unda cu solamente e tin acceso. E parti cu ta di menos gusto, ta cu e ta ofreciendo e video aki na Kim su pareha di ken e ta actualmente separa, Kanye West.

E motibo dicon, ta cu den Wack su opinion y bista, e ta un muestra di respet pa laga Kanye West ta e doño di e grabacion aki, mirando cu e ta mama di su yiunan, y nan ta den un matrimonio, aunke cu esaki ta den proceso di un divorcio. Sinembargo, tambe Wack ta sugeri pa Kanye converti den un video exclusivo, y genera ganashi riba e esaki usando fanaticonan y personanan cu kier mira e video en cuestion. Wack a haci e oferta aki solamente na Kanye West, pero no na Kim Kardashian mes, ken ta e persona envolvi den e grabacion.

Bootleg Kev a haci Wack 100 un pregunta hopi importante durante e grabacion, bisando “con Ray J ta sinti di tur esaki?” na cual Wack a bisa cu Ray J no kier haci e video publico ni revela e existencia di esaki, pa motibo cu e mes ta un tata actualmente, y no lo haci un acto di mal gusto asina na ningun hende. Tambe e ta laga cla, cu e video no lo sali na luz di nan parti.

E ta un declaracion straño, cu no ta confirma, pero si tin e posibilidad di ta berdadero. Kim y Ray J tabata hunto pa por lo menos algun aña, haciendo cu no ta imposibel cu tin otro grabacionnan similar na esun cu ya tabata publico.

Sinembargo, Kim Kardashian su abogado a contesta cu Wack 100 ta desespera pa atencion y simplemente kier molestia Kim y Kanye, bisando cu e tin den su posesion e video en cuestion.

Papiando como representante di Kim, e abogado legal Marty Singer a desmenti Wack su declaracion bisando: “E declaracion cu tin un video cu no a keda lansa ainda ta completamente falso. E ta hopi tristo y decepcionante cu tin persona cu te ainda ta haci declaracionnan di e clase aki, pa purba gana 15 minuut di fama.”

Singer ta conoci pa di no duda den procede di manera legal den contra di personanan cu kier haci daño na Kardashian, haciendo cu ta probabel cu esaki ta e ultimo comentarionan cu lo haci tocante e tema, y den caso cu Wack 100 sigui, ta hopi probabel cu e proximo declaracionnan lo keda haci den corte.