A traves di un comunicado di prensa, Vereniging van Werknemers met een Individuele Arbeidsovereenkomst in dienst van de Water- en Energiebedrijf Aruba (W.E.B.) N.V. a indica cu nan a tuma nota di e decision di Corte den e apelacion entama contra e recorte salarial durante temporada di pandemia, y cu nan ta acepta esaki.
“VWI a tuma nota di e decision di Corte den e apelacion cu a wordo entama contra di e recorte salarial cu a wordo implementa unilateralmente durante pandemia. A pesar di e hecho cu VWI tin su mesun opinion encuanto legalidad di esaki, VWI respetando nos sistema hudicial lo sa di acepta y biba cu e decision di Corte”, e organisacion a bisa den e comunicado di prensa. “VWI lo sigui defende derechonan di su miembronan cu e mesun fervor awor y den futuro y ta spera cu e decision di Corte lo no wordo malusa den futuro pa introduci otro medidanan unilateralmente.”
E organisacion mester a warda mas cu dos aña prome cu a ricibi e veredicto aki. Por corda cu na maart ultimo, VWI a cumpli dos aña desde cu a entrega su apelacion den Hoger Beroep pa cu e uitspraak di Gerecht in Eerste Aanleg di 10 di maart 2021 riba e kort geding cu VWI-Vereniging a span contra W.E.B. Aruba NV pa loke ta trata e decision unilateral di WEB pa corta entrada di su trahadonan cu 12.6% pa henter aña 2021. Manera ya ta conoci caba, hues mr. J.M.J. Keltjes a duna su uitspraak riba 10 di maart 2021, cual uitspraak no tabata na fabor di VWI-Vereniging. E mes un dia ey tambe, Gerecht in Eerste Aanleg a core saca un comunicado di prensa anunciando den tur medio di comunicacion e uitspraak hues Keltjes. “Esaki no ta un practica usual di nos corte di husticia”, e organisacion a comenta e tempo aya.
Segun VWI, “despues cu VWI a tuma nota di e uitspraak di corte, VWI a busca conseho di su consehero legal y tambe di otro huristanan riba e uitspraak aki di corte. Tur, pero tur feedback cu VWI a haya for di esnan cu conocemento di e materia ta cu e uitspraak di hues Keltjes ta “kort door de bocht” y cu no ta cuadra cu hurisprudencia existente. E uitspraak riba e kort geding K.G. nr. AUA202100225 ta, conforme varios huristanan unda VWI a busca nan opinion, por lo minimo un uitspraak “straño””.
Pa e motibo aki, VWI, den e mesun luna di maart 2021, a apela e sentencia di hues Keltjes den un Hoger Beroep na Gemeenschappelijk Hof van Justitie (“Hof”). Riba 20 di september 2022 e caso di Hoger Beroep (AUA202100053KG) pidi pa VWI na Hof tabata riba “rol” pa duna vonnis. E vonnis a wordo posponi. Dia 15 di november 2022 e mes un caso aki ta riba rol pa duna vonnis y atrobe esaki a wordo posponi. E ultimo rolbehandeling di Hof tabata esun di 28 di maart 2023 y e caso di Hoger Beroep di VWI no ta aparece riba e rol mes.
Awo finalmente VWI a ricibi e vonnis den e caso aki, cu ta clausura e bataya legal pa e organisacion.
