(DutchNews.nl) – Parlamentarionan di partido liberal derechista VVD a haci un yamado na minister di Educacion, Robbert Dijkgraaf pa haci mas pa limita e cantidad di studiante internacional bayendo Hulanda.
Anteriormente e aña aki, Dijkgraaf a suspende legislacion cu lo a permiti universidad y scolnan pa pone limite riba studiantenan stranhero, pendiente un revision. Pero Parlamentario di VVD, Hatte van der Woude a bisa AD cu e ta preocupa cu no haciendo suficiente. “E minister kier pensa riba esaki, como un profesor pensante, y despues prepara un vision pa futuro”, el a bisa. “Mi no a mira un propuesta. Y mientras tanto, universidadnan ta yenando atrobe.”
E aña aki un cantidad di universidad a haci un yamado na studiantenan stranhero pa no bin a menos cu nan a organisa acomodacion adelanta. Van der Woude a bisa cu e tambe ta preocupa tocante localnan yen y e falta di espacio den laboratorio.
Algun curso cu un cantidad fiho di studiante ta yen di stranhero, y “ta coriendo cu studiantenan Hulandes”, segun e parlamentario. E tin plan pa pidi Dijkgraaf pa splica kico e ta haciendo pa reduci cantidad durante e debate awe riba presupuesto di ministerio di Educacion.
Alrededor di 85,500 studiante internacional actualmente ta studiando na un di e 14 universidad di Hulanda, y 72% di nan ta bin di Europa, segun cifranan publica pa Asociacion di Universidad Hulandes luna pasa. E total ta un aumento di 7.2% compara cu e aña academico anterior, pero menos crecemento cu añanan anterior, cual a varia entre 12% y 15%. Asociacion di Universidad Hulandes a campaña desde 2018 pa reglanan nobo pa permiti nan maneha e fluho di studiante internacional y e impacto riba calidad di e estudionan.
UvN a bisa DutchNews cu universidadnan ta dispuesto pa impone limite riba varios estudio cu ta popular cu studiantenan internacional den un esfuerso pa limita cantidad. Lo haci esaki sea door di impone limite riba e cantidad di studiante cu por registra, of limite riba e cantidad di estudio no-Hulandes den materianan manera psicologia, management y politica, UvN a bisa. E aña academico aki, 340mil studiante tabata siguiendo un estudio Bachelor of Master na Hulanda.
