Vuelonan di British Airways no solamente ta diversifica mercado turistico di Europa, sino ta habri oportunidad specifico pa mercado di incentivo y reunionnan

E conexion London Aruba cu British Airways lo trece na Maart 2023 ta trece hopi emocion cerca ehecutivonan di turismo y aeropuerto di Aruba. Poco hende realmente ta realisa tur e energia y dedicacion pa no papia di pasenshi y enfoke cu a hinca pa a logra un aerolinea asina prestigioso pa dicidi pa bula pa Aruba.

Como tal, e tabata hopi emocional pa esnan cu a mira un esfuerso cu a inicia na 2012 pero cu a bira uno dirigi na 2015, keda corona cu e acuerdo cu British Airways.

Pa Sanju Luidens Darjanani, “e ta un di e momentonan mas emocionante den mi carera di 30 aña den turismo.” E Director di Mercadeo di ATA a bisa Bon Dia Aruba cu e vuelo di British Airways no solamente ta representa logro di trabou den ekipo, pero e ta anticipa cu e mesun energia lo keda pa percura cu Aruba como destinacion ta cla pa ricibi turistanan Britanico, Europeo y di otro parti di mundo cu awor lo tin Aruba riba nan itinerario.

“Nos tabatin ‘setbacks’ pero si nos refleha riba tur e momentonan aki, e ta sinti ainda mas bunita pa anuncia e logro,” Director di Aruba Tourism Authority, Ronella Croes a enfatisa.

For di 1997 Aruba ta presente den e mercado di Reino Uni, aunke cu Hulanda ta e mercado Europeo principal pa e mercado turistico. “Pero durante añanan, Reino Uni a crece y bira e di dos mercado mas importante for di Europa pa Aruba,” Croes a sigui bisa. Na 1997 a ricibi 2679 bishitante di Reino Uni y na 2010, e cifra a bira 14.502 bishitante di Reino Uni. Na 2017, e mercado a mustra otro crecemento, pa un total di 19, 201 bishitante, cu ta e aña record. “E aña ey, e mercado di Reino Uni a representa 21 porciento di esnan cu a bin Aruba. Locual ta spera di British Airways ta alrededor di 15 mil bishitante, cu ta pone cu ta mira un crecemento di 38 porciento compara cu 2019, cu tabata e ultimo aña normal pa turismo.” Croes a bisa cu e proyeccion aki lo ilustra un otro record den turismo pa Aruba. “Pa a haci Reino Uni e di dos mercado Europeo mas importante a rekeri hopi esfuerso, hopi negociacion. No solamente cu British Airways, pero tambe reconoce e socionan clave manera KLM y TUI.” Director di ATA a bisa cu e dos partnernan aki tambe a traha duro pa percura cu Reino Uni ta e di dos mercado Europeo pa Aruba, cu ta resultado di diferente campañanan di promocion di Aruba na Reino Uni, specificamente na London. ATA a logra pa medio di inversion den mercado y traha strategicamente cu partnernan, pa asina particularmente diversifica e mercado turistico pa e pais.

Un di e partnernan ta e Gerente di Mercado Reino Uni, Joanna Walding, kende su mes conoce Aruba pa 15 aña y su soño tabata pa logra un vuelo directo for di su pais. Y awor cu e ta un realidad, “mi no por ta mas orguyoso di locual Aruba a logra,” Walding a bisa. “Mi ta spera cu pronto nomber di Aruba lo ta uno hopi conoci cerca tur na Reino Uni, cu ta beneficia tur hende. E entusiasmo ta hopi grandi, a hasta acerca mi pa medio di mi Facebook personal.”

Tirso Tromp, Director di ATA Europa tambe a enfatisa e trabou den ekipo y a bisa cu e mes ta hopi impresiona pa e curashi cu a tuma pa trece British Airways pa Aruba.

All-Inclusive

No ta un secreto cu paketenan all inclusive ta hopi popular cu turistanan di Reino Uni, particularmente ora ta papia di destinacionnan den Mediteraneo y tambe islanan Ingles den Caribe. Pero Tirso Tromp a sigura cu e promocion pa Aruba lo no ta dirigi unicamente riba e producto all inclusive presente na Aruba tambe. “Nos no ta promove Aruba como un destinacion ‘all inclusive.’ Nos tin hotelnan cu ta ‘all inclusive,’ cu tin nan parti den e producto. Nos ta promove Aruba como un destinacion completo, unda ta enfoca riba e conscientisacion y deseonan di tur partner, cu ta hotelnan y operadornan kendenan ta yuda guia e bishitante den su jornada di cliente, y asina haci nan decision pa biaha pa Aruba.” Y den e sentido ey, producto Aruba ta ofrece e turista Britanico hotelnan di cinco strea te na casnan of apartamentonan comodo. “Lo tin algo pa tur hende, y esey ta locual nos lo bay p’e.”

Joanna Walding a agrega cu British Airways tambe tin su propio programa di vakantie, unda ta promove diferente tipo di acomodacion.” Los di esey, Walding a bisa cu na momento di a anuncia e conexion aereo cu Inglatera, diferente operador di tour a tuma contacto cune pa asina cuminza bende e producto Aruba y nan ta varia di personanan cu ta bende villas, apartamento, hotel of otro. “ E vuelonan directo aki realmente ta habri e mercado y pa tur hende por haya pida di e bolo,” Walding a enfatisa.

Producto Aruba ta gusta

Di su banda, e Director di Mercadeo di ATA, Sanju Luidens Darjanani a bisa cu e vuelonan di British Airways no ta diversifica solamente e mercado turistico en general, nan ta diversifica e mercado Europeo y e tipo di turismo. Mientras cu kizas ta preparando pa turistanan di Reino Uni, ATA ta vislumbra e mercado di conferencia, incentivo y reunion, cu regularmente ta pa bishitanan di estadia cortico. E schema di e vuelonan di British Airways ta ideal pa e gruponan aki, cu generalmente ta keda un destinacion di reunion pa algun dia so.

Pa loke ta producto Aruba mes, Luidens Darjanani ta convenci cu basa riba encuestanan memey di turistanan Ingles, e destinacion ta hopi gusta. “Ta conoci cu Aruba ta un destinacion hopi gusta y e entusiasmo ta grandi.

Tin hopi expectativa pa Aruba,” Luidens Darjanani a agrega. “Pero esaki ta duna nos mas responsabilidad pa traha riba e producto,” e ehecutivo di ATA a sigura Bon Dia Aruba.