Vuelo directo di Brazil pa Aruba: Mercado Brasilero ta un di mercadonan top na Aruba

Durante un conferencia di prensa ayera mainta na Aeropuerto Internacional Reai Beatrix, minister di Salud y Turismo, Dangui Oduber, hunto cu CEO di Aruba Tourism Authority (ATA), Ronella Croes y Jo-Anne Arends di Aruba Airport Authority (AAA), a anuncia cu pronto Aruba lo wordo conecta directamente cu Sao Paulo, Brazil, a traves di un vuelo directo cu e aerolinea Gol.

Despues di mas di dos decada Aruba ta bay tin un vuelo directo for di Sao Paulo, Brazil. Esaki ta den cuadro cu e maneho di no solamente Gobeirno di Aruba, pero tambe di ATA y AAA cu ta enfoca den sigui expande e mercado di Latino America, cual ya caba a crece cu mas di 20% den 2023.

Arends di AAA a splica cu e aerolinea no lo enfoca solamente ariba e parti di mercado Brasilero, pero tin oportunidadnan pa ofrece conexion cu otro aerolineanan y otro paisnan, entre otro Buenos Aires, Argentina. Aki ta premira cu 25% di e trafico di vuelo lo bin for di Argentina, 60% for di Sao Paulo, 13% di Rio de Janeiro y despues lo expande e conexionnan pa otro ciudad- y paisnan.

Croes di ATA a remarca cu e mercado aki ta importante pasobra e patronchi di gasto di Brasileronan tambe ta hopi atractivo, den contexto di turismo di calidad y con nan ta midi esaki.

El a splica cu nan ta midi di un banda, unda cu tin datos disponible, kico e hende su entrada anual ta, aunke esey no kiermen cu nan ta esunnan cu ta gasta mas, pero nan ta midi tambe na Aruba pa medio di uso di credit card, entre otro, kico nan ta laga atras.

Croes a indica cu si mira e datonan historico, Brazil ta un mercado top y semper tabata den e top di esnan cu ta gasta mas. Tambe mirando e cifranan di uso di credit card di aña pasa, el a remarca, por mira cu Brazil a destaca.

El a agrega cu e parti di Argentina ta keda hopi importante tambe pasobra e turistanan Argentina ta esnan cu ta keda promedio mas largo na Aruba y esey ta hacie atractivo cu nan ta laga mas atras pasobra simplemente nan tin un averahe di estadia mas largo. Apart di esey, el a indica, cu nan ta scoge hotel y no all-inclusive necesariamente.

“Asina nos ta midi cada mercado y nan contribucion, entre otro, y nan patronchi di gasto tambe ta atractivo,” el a resalta.

E prome vuelo directo for di Sao Paulo pa Aruba lo ta riba dia 18 di december di e aña aki.