Despues cu recientemente a keda conoci cu tin un cepa nobo di coronavirus SARS-CoV-2 cu a registra na Inglatera, varios pais, incluyendo Hulanda, a cera frontera cu Reino Uni pa purba preveni cu e cepa nobo di e virus lo sigui plama. Sinembargo, na Aruba e vuelonan ta sigui normal.
Segun un relato di portal noticiero Antilliaans Dagblad, siman pasa ainda tabatin vuelonan di Inglatera yegando Aruba, mientras Crisis Team no a mira motibo pa stop e vuelonan.
Mientras tanto, Europa ta lucha contra un cepa nobo di e coronavirus, cual aparentemente ta mas contagioso, y ta pa e motibo aki cu cantidad di pais a cera nan frontera pa personanan di Reino Uni.
Pero na Aruba for di dos siman atras tin un vuelo semanal ta yega for di Inglatera. Segun e relato di Antilliaans Dagblad, Crisis Team a evalua e proceduranan di test na aeropuerto Reina Beatrix y a evalua e situacion, y asina a conclui cu e riesgo cu lo importa e variacion nobo di e virus ta hopi chikito. Pa e motibo aki no a cancela e vuelo.
Crisis Team ta bisa cu ta test tur pasahero na yegada. Riba e vuelo siman pasa for di Inglatera a resulta cu 85 porciento di pasahero a haci un test prome cu nan vuelo y nan resultado tabata negativo. E chens cu un pashent contagia ta abordo ta considera como chikito, y por detecta esaki na yegada, y pa e motibo aki e maneho no a mira cambio.
