Recientemente Minister di Asunto Economico, Geoffrey Wever a saca un comunicado den cual e ta indica cu ta bay cuminsa cu un estudio cu ta bay midi e impacto di vacation rentals riba e cantidad di casnan pagabel pa localnan. Vacation Rentals Profesionals Aruba (VRPA) a tene un conferencia di prensa ayera, durante cual nan a reaccion ariba comunicado di Minister Wever y a duna algun recomendacion pa tene cuenta cune pa e estudio.

Alex Cybul, Tesorero di VRPA, a indica cu nan ta aplaudi Minister Wever pa e iniciativa pa busca un solucion pa e situacion cu tin di casnan pagabel pa hende local. El a remarca cu nan ta na altura cu tin un problema y como cu vacation rentals a wordo anuncia como parti di e estudio, como e profesionalnan di vacation rentals di Aruba, nan ta sinti cu nan mester ta invita na mesa pa cu esaki.

El a enfatisa cu nan pensamento pa e estudio aki ta cu e informacion mester ta concreto y cu no solamente mester pensa con vacation rentals ta causando e situacion aki, pero kico otro tambe por ta causando e situacion aki. “Tin hopi otro cosnan cu por tin referencia riba e asunto di casnan pa hende local cu aworaki tin un scarsedad di dje,” el a indica.

“Nos ta na disposicion di gobierno, pa yuda busca e miho practicanan. Hopi estudio a yega di wordo haci rond mundo. Nos ta e profesionalnan na Aruba, nos ta esunnan cu tur dia ta traha cu esaki cu na Aruba y nos ta kere e Arubiano cu ta haci esaki na Aruba mester por tin palabra den e estudio of den locual cu tin di haci cu vacation rentals na Aruba,” el a agrega.

Sr. Sjoerd de Vries, presidente di VRPA, a ratifica cu nan ta representa e industria di vacation rentals na Aruba cu ta un grupo hopi grandi y a sigura cu tur nan miembronan ta cumpli cu tur rekisito di gobierno. De Vries a trece pa dilanti tambe varios punto di e importancia y cu ta recomendacion pa practicanan sostenibel y responsabel di vacation rentals.

El a informa cu 50% di e alohamento disponibel na Aruba ta representa pa vacation rentals. Pa loke ta a estudio cu Minister Geoffrey Wever a autorisa cu ta bay midi e impacto di vacation rentals riba e cantidad di casnan pagabel pa localnan, de Vries ta indica cu nan ta aplaudi e iniciativa pasobra e ta algo cu Aruba tin mester di dje. “Nos mester sa exactamente unda nos y unda nos ta bayendo,” el a remarca.

Aña pasa VRPA a conduci un estudio di impacto y den e estudio aki nan ta indica cu vacation rentals tin un impacto grandi pa e economia di Aruba, e industria ta yuda crea cuponan trabou, 5635 segun estudio presenta aña pasa a indica. .

Un punto hopi importante cu de Vries a subraya tambe ta cu estudionan di impacto social y ehempelnan di mundo real a demostra cu vacation rentals tin un impacto minimo ariba e accesibilidad di vivienda. El a agrega cu restriccionnan di vacation rentals casi nunca a provoca un caida significativo di huur of e prijs di viviendanan, segun e estudionan aki a demostra. .

De Vries ta señala cu e fuentenan principal di instabilidadd di e prijsnan di vivienda y huur ta pa motibo di e resultadonan economico y di e mercado laboral. Esaki ta inclui e prijs di material di construccion, escasez di personal cualifica pa traha, restriccionnan di e zonanan y e tamaño di e terenonan, entre otro.

El a enfatisa cu oferta di vivienda y permiso di construccion mas abundante tin un impacto siginificativo ariba e prijs di vivienda pa localnan y cu ta poco probabel cu e adopcion di regulacionnan mas streng pa vacation rentals lo resolve e problema di accesibilidad di vivienda pagabel pa localnan.

Na mesun momento el a remarca cu e casnan di vacation rentals ta mas luhoso y ta den e mercado di escala halto, y no den vivienda pa trahadonan.

VRPA a presenta 10 punto como sugerencia pa practicanan sostenibel y responsabel di vacation rentals na Aruba:

1. Introduccion di un sistema di licencia pa vacation rentals; esaki lo proporciona un marco legal pa regula vacation rentals y sigura cu nan ta cumpli cu cierto standards.

2. Aumenta cumplimento di impuesto; cera acuerdonan cu OTA (Airbnb) pa remiti e impuesto turistico y impuesto ambiental den nomber di e doño y permiti e managernan di vacation rentals remiti impuesto den nomber di e doño den funcion di e ingresonan general lo sigura e igualdad di condicionnan entre vacation rentals y hotelnan tradicional.

3. Enrikese y empodera e forsa laboral di Aruba; vacation rentals ta crea un variedad amplio di trabounan di diferente nivel, nan ta brinda un oportunidad na empresenan local di tur tamaño.

4. Sigura un ekilibrio adecua entre vacation rentals y vivienda pagabel; pa sigura cu no tin un desbalanse, VRPA ta propone un cantidad limite di licencia di vacation rentals disponibel na 7% di e unidadnan residencial na Aruba. Lo por distribui tambe e licencianan rond di e isla y reserva algun pa localnan y apart di esey parti di e tarifa di vacation rentals lo por wordo usa pa apoya proyectonan di vivienda accesibel.

5. Introduccion di un plan di maneho di desordo; comunica esaki na e huésped prome cu nan yega, tin un persona disponibel pa contesta cualkier yamada di keho di desordo y e persona lo mester presenta na e sitio dentro di 30 minuut den caso cu no cumpli cu e maneho.

6. Introduccion di un plan di maneho di parking; comunica e disponibilidad di parking cu e huesped prome cu e yega y limita e parking na 1 auto pa cada dos camber den e cas.

7. Introduccion di un plan di maneho di sushi; comunica cu e huespednan e luga pa tira sushi, orario y dia cu ta piki sushi y si no cumpli cu e maneho, lo haya un boet.

8. Mantene e ambiente di e bario: mantene e vacation rentals limpi, bunita y sigur pa por huur nan.

9. Atrae mas famia, millennials y GenZ; Millennials y GenZ ta prefera vacation rentals y no hotel tradicional y nan ta representa e 75% di tur consumidor y biahero pa 2025. 19% di persona cu bin cu vakantie a keda den un vacation rentals pa prome biaha durante pandemia, 86% ta plania di sigui haci esaki y ademas 52% di e huespednan a afirma cu nan ta prefera vacation rentals.

10. Retene e ingreso na e comunidad Arubiano; actualmente 50% di e doñonan di vacation rentals cu ta mimebro di VRPA ta local. E placa ta wordo gasta na Aruba y ningun placa ta sali pa corporacionnan den exterior