Relaciona cu e articulo tocante campaña nacional di conscientisacion y siguridad den trafico cu minister di Husticia Rocco Tjon ta bay bin cune na luna di maart y cu a ser publica den edicion di Bon Dia Aruba dia 21 di februari ultimo, Vereniging Rijscholen Aruba (VRA) kier trece dilanti algun puntonan di preocupacion.
Nan ta sigura cu na prome luga nan ta contento cu por fin minister Tjon ta mira cu a bira ora pa cuminsa un campaña di conscientisacion di trafico, nan tabata tin nan remarkenan desde cu e rijscholen a lanta e asociacion pa motibo cu nan a señala hopi problema cu tin cu trafico general y minister Rocco Tjon a ser poni na haltura di tur e problemanan ki.
Ta desde aña 2017 bin ariba cu V.R.A. a acerca gobierno cu nan preocupacionnan relaciona cu tin den trafico y e tempo ey nan a señala principalmente e problemanan cu tin cu e asunto di examen rijbewijs.
Den principio nos a acerca minister di Husticia Andin Bikker y a mustr’e cu tin hopi problema cu e asuntonan aki y e ex-minister Bikker a lanta un Taskforce den cual a nombra diferente stakeholders pa traha, incluyendo polisnan pensiona pa duna nan aporte cu e asunto di rijbewijs. Den e taskforce aki tambe tabata tin representantenan di Korps Politie Aruba.
Naturalmente no por ataca tur asunto di trafico pareu y a dicidi pa cuminsa cu e parti cu V.R.A. ta para pe, esta examen pa rijbewijs di categoria A te cu E.
“E trabaonan a cuminsa den bon ambiente bao di minister Bikker y tabata move basta bon a pesar cu aki aya tabata tin punto nan cu tabata mester di mas atencion pa yega na un punto satisfactorio,” Tomas Ruiz ken ta secretario di VRA ta sigura.
Igualmente, ta señala cu lastimamente e combersacionnan despues cu a bin cambio di minister di Husticia, “cosnan a pega formalmente y te cu awe nos di V.R.A. tin como dos aña sin tende di minister Rocco Tjon. Nos no por keda sin bisa cu a tuma algun cambio positivo pero nos a keda leu di ta cla.”
Riba nan diferente solicitud como por ehemplo, pa revisa e examen pa rijbewijs tanto e parti teoretico/digital y e parti practico falta hopi pa haci, peticion pa revisa e ley di trafico cu su landsbesluiten, esta e Landsverordening Wegverkeer, nada un tuma luga, riba e peticion pa certifica tur rijscholen, pa di e forma ey candidatonan cu kier pasa examen pa nan rijbewijs sa cu nan ta haya rijles for di persona nan cualifica, nada ainda no a tuma luga, riba e peticion pa certifica tur e persona nan cu ta pasa candidatonan examen pa un rijbewijs, te cu awe no a tuma luga, riba e peticion pa no laga e departamento di examen rijbewijs cay mas bao di Cuerpo Policial, te cu awe no a tuma luga siendo cu minister Tjon ta di opinion cu mester kita e examen aki for di Cuerpo Policial.
“Pa bo yega na un trafico safe y sigur pa tur usuarionan di nos camindanan bo mester tin hende bon prepara pa pasa e examennan y tambe bo mester tin vehiculonan cu ta segun e ley ora di pasa e examen practico.” Ruiz a comenta.
Trafico ta consisti di tres E cu ta punto nan di salida pa bo tin un trafico sigur y safe. E tres punto aki ta:
1. Educacion, VRA ta indica cu te awe gobierno no tin un programa di educacion di trafico siendo tempo di ex-minister Bikker a papia cu e programa aki mester start y gran parti no a continua pa motibo di Covid y despues minister Tjon no a continua cune.
2. Enforcement, esaki mester tuma luga door di polis. VRA ta declara cu tur hende sa cu tin hopi scarsedad di polis y nan ta haci nan best pero por mira cu e no ta yuda door cu ta tene poco control.
3. Engineering, esaki ta e camindanan cu mester ta bon construi, comprendibel y borchi cu marcacionnan mester ta segun e ley di trafico.
VRA ta remarca cu ta for di e tres punto aki tin cu traha pa un trafico bira mas sigur y safe “pero si nos sinta warda manera cu nos ta mira cu desde hopi aña pasa cu gobernantenan no a tene cuenta cu e tres aspecto principal aki, nos di V.R.A. ta bisa cu nos trafico pa e motibo nan ey ta hopi peligroso.”
Nan ta consider’e peligroso, pa motibo cu tin hopi chauffeur cu prome cu aña 2000 no sa of no a pone nan na haltura di tur e cambionan cu a tuma luga y Ruiz ta comenta cu hopi di nan a lubida e reglanan cu nan a siña den pasado, eynan e aspecto di “Educacion” ta conta.
Pa e motibonan aki, V.R.A. no kier a warda mas y a cuminsa cu hopi organisacion den barionan riba peticion di hopi chauffeur y specialmente e 60+ nan, cu lezing di trafico.
Durante e lezingen nan ta sigura cu nan ta ripara cu hopi tin miedo di core riba Green Corridor, Avenida Nelson Oduber y Avenida Watty Vos, specialmente ora nan mester subi y baha for di e rotondenan y ora di haci uso di sign light.
Tin hopi crusada y partimento di crusada, manera Y-splitsing, crusadanan bajonet, cu nan tin dificultad pa compronde door di nan construccion, aki ta papia di e “Engineering”.
“Enforcement” manera nan ta bisa caba, falta hopi y nan ta na haltura di e motibonan, hasta pa yuda cu e enforcement nan a sugeri gobierno kico por haci.
Cu e puntonan aki riba nan kier informa cu tur tempo tabata tin hende dispuesto pa yuda cu siguridad di trafico aki mes na Aruba cu sa y conoce e dolornan den e trafico “pero nos ta mira cu minister Rocco Tjon a prefera di busca hende na Hulanda cu no ta domina nos ley di trafico y cu no conoce nos infrastructura y con nos hende nan ta comporta den trafico, pa por haci’e mas safe pa nos tur cu ta biba aki na Aruba.” Ruiz a sigura.
Otro aspectonan cu nan ta considera importante ta lo siguiente:
– Ora di sigura vehiculo, hopi hende no sa e contenido di e polisa.
– Vehiculonan cu no ta gekeurd na tempo y eficiente cu entre otro, ta core hopi aña sin keur.
– Vehiculonan cu no ta paga Motorrijtuigenbelasting.
– Vehiculonan manera aanhangwagen/trailer cu niun departamento no ta keur nan.
– E vehiculonan cu a yega Aruba ultimo tempo manera, e-bike, e-step, e-scooter.
– Party bus nan cu a haya permiso, siendo nan ta contra e reglanan cu tin den e ley di
Trafico.
– Vehiculonan ATV y UTV cu ta blokia tur rotonde y crusada y cu ta causa hopi zonido, stof y molestia.
– E conseho cu e comision a duna tocante e RHD nan cu ta peligroso.
– Demasiado uso di alcohol den trafico cu falta hopi control.
Nan ta enfatisa cu por lesa cu minister Tjon ta bisa cu a base di cifranan cu a ricibi ta indica cu e trafico ta stabiel pero tin demasiado, “pero pa nos di V.R.A. e trafico no ta stabiel door cu hustamente tin demasiado accidente. Un trafico no por ta stabiel ora cu tin demasiado accidente.
Den esaki, V.R.A. ta kere cu “si gobierno hunto cu minister Tjon a sinta manera hendenan responsabel cu tur stakeholders na mesa y atende e problemanan aki, por a yuda cu nos trafico desde algun tempo caba por tabata hopi mas stabiel y hopi mas sigur.”
Pa ultimo, nan a dirigi un otro mensahe na minister Tjon “beter laat dan nooit pero bo falta e otro dos E nan y esun cu bo ta bay atende cune awo cu ta Enforcement, nos ta desea bo hopi exito y spera cu nos por mira e resultado den nos trafico cu lo mester bira mas safe y sigur den tur aspecto, despues di bo campaña.”
Ademas, N.B. Directiva di V.R.A. ta invita tur minister y specialmente minister Rocco Tjon y tur parlamentario na e lezingen cu nan ta bin realisando den diferente centro di bario pa asina por scucha con e pueblo ta para relaciona cu trafico na Aruba.
