Recientemente Vereneging Rijscholen Aruba (V.R.A.) a manda un carta pa Alto Comisario di Polis, Ramon Arnhem, pa trece dilanti nan preocupacion y obhecion pa cambionan cu a ser introduci recientemente den e Bureau Examen Rijbewijs pa loke ta trata cantidad di candidatonan cu por inscribi pa examen di rijbewijs.

Den e carta data 28 di maart 2025 cu V.R.A. a manda pa e Alto Comisario e organisacion ta splica cu miembronan di V.R.A. a informa e directiva di e organisacion cu den gangnan ta ser bisa cu lo tin cambionan na caminda pa locual ta trata reduccion pa inscripcion di candidatonan pa examenrijbewijs y si e directiva ta al tanto di dicho cambionan, na cual e contesta di V.R.A tabata negativo.

E cambio cu Bureau Examen Rijbewijs a introduci ta cu e lista di entrega ta bira un total di maximo 5 candidato pa siman, y cada examen di tipo di rijbewijs, aunke e ta di mesun persona, ta conta como un inscripcion separa; y tambe cu pa inscribi cada candidato mester presenta identificacion valido original, no ta acepta copia ni potret.

“Pa nos sorpresa dia 24 di maart 2025, cu ta fecha cu ta reserva pa rijscholen por inscribi nan candidatonan, nos a wordo informa cu un email, conteniendo un carta data 20 di maart 2025, a wordo manda pa e rijscholen informando nan di e cambionan. Mester remarca cu V.R.A , cu ta representa mayoria di e rijscholen, cu ta un rechtspersoon por medio di Statuut y cu ta e gesprekspartner mas importante den e discusion aki, lamentablemente no a ricibi e email ya menciona,” e organisacion a subraya den nan carta.

V.R.A ta splica cu considerando cu e cambionan presenta tin consecuencianan drastico y negativo pa nan clientela y pa nan miembronan, riba iniciativa di e directiva, nan a acerca Sr. Edgar Maduro, ken recientemente a ser apunta como coordinador di e Bureau Examen Rijbewijs pa un reunion informativo.

Dia 25 di maart 2025 VRA e reuni informalmente cu Sr. Maduro. Segun e organisacion ta indica e reunion aki a bay den un bon ambiente y a intercambia pensamento riba varios topico cu tin nan atencion y a propone pa sinta na mesa pa bin cu solucionnan structural y duradero.

Tocante e carta di dia 20 di maart 2025,  V.R.A. a informa Sr. Maduro cu nan tin obhecion riba ambos punto di cambio cu a ser introduci y e organisacion a informa tambe cu lo consulta cu su miembronan.

Durante un reunion extraordinario di V.R.A. teni dia 27 di maart 2025 miembronan presente a dicidi cu pa loke ta trata e reduccion di 10 pa 5 candidato pa rijschool, cu Bureau Examen Rijbewijs su ponencia pa reduci e candidatonan ta debi na scarsedad di personal.

Den e carta V.R.A ta recorda cu den pasado na varios ocasion V.R.A. a mustra cu tin comprension pa esaki, pero cu V.R.A. a sugeri pa introduci inscripcion online cu lo elimina e problema aki di inmediato y na mesun momento esun di identificacion valido.

“Nos ta den aña 2025 y mester haci uso di tecnologia. Mas ainda cu un gobierno ta promoviendo E-Governance y cu tin fondo disponibel. Censo ta dispone di e programa aki y a ofrece K.P.A. pa haci uso di dje. Censo a produci full e procesbeschrijving  y  KPA solamente mester a produci un “timeslot” pero pa motibonan desconoci esaki no a  tuma lugar,” e organisacion a señala.

V.R.A. ta subraya cu no mester perde mas tempo valioso den e asunto aki y trece K.P.A. y Censo hunto pa soluciona e problema aki pronto.

“Miembronan presente a dicidi di no ta bay di acuerdo cu e ponencianan poni den e carta di dia 20 di maart 2025 y ta urgi pa K.P.A. revoca esaki di inmediato. V.R.A. como gesprekspartner ta pidi pa ser respeta y ta boga pa reanuda e combersacionnan pa asina discuti e puntonan pendiente. Miembronan ta pidi pa esaki tuma lugar no mas tarda cu 1 siman,” e carta a finalisa.

Ademas di manda e carta pa Alto Comisario Ramon Arnhem, V.R.A. tambe a manda e carta pa minister di Husticia nobo, Arthur Dowers.

Esaki no ta prome biaha cu e organisacion ta trece dilanti nan preocupacion pa problemanan cu tin den BER.

Den pasado e organisacion a yega di expresa cu nan ta ki ta nan sosten pa e examen di rijbewijs. E momento aki nan a trece dilanti nan preocupacion pa un problema cu a surgi cu e formulario di dokter cu e candidatonan di e examen di trafico mester yena prome cu nan bay pasa e parti di e examen di practica pa bay core auto.

Den e caso specifico aki tabata trata di un candidato di examen di rijbewijs cu a bay entrega su formulario di dokter na BER, despues di a haci un chekeo medico cu dependiendo di e dokter por a costa un suma di entre 60 cu 75 florin, caminda un personal di Bureau Examen Rijbewijs a bisa cu e no ta aceptable pasobra e no ta un dokter cu ta traha cu AZV.

Miembro di V.R.A. a aclaria cu e rekisito importante ta, cu aunke un dokter ta cu pensioen, e mester ta registra den AruBIG y e firma di dokter mester ta registra nacional y internacional y asina e dokter por practica su profesion te ora cu e salud no ta permitie mas.

V.R.A. tambe a indica anteriormente cu e departamento aki, esta BER, mester sali di KPA y bira un departamento independiente. Na mesun momento e organisacion a remarca cu si ta bay cambia e departamento y pone independiente, pero e ta bay cu e mesun personal of e mesun sistema, e ora no ta bale la pena independis’e.