For di awe y durante e siguiente 6 dianan, alrededor di 5 mil Colombiano na Aruba tin oportunidad di participa den eleccion pa eligi un presidente nobo den nan pais.

Consul di Colombia, Mirza Gnecco a declara na Bon Dia Aruba cu manera ta conoci publicamente, for di dia 21 te cu 27 mei ta tuma luga e proceso electoral pa eligi presidente y vice-presidente di Colombia pa e ciudadanonan Colombiano cu ta residencia den exterior.

Tur Colombiano debidamente registra den e censo electoral di Registraduria Nacional di Colombia y debidamente identifica cu nan cedula, lo por haci uzo di e derecho constitucional y democratico aki den nan sede consular di Colombia na Aruba situa na Julianastraat 4. E diplomatico a bisa, cu for di 8or di mainta te cu 4or atardi e proceso di votacion ta cuminsa durante e siguiente 6 dia te cu dia 26 di mei awor. E ultimo dia di eleccion lo ta diadomingo 27 di mei, unda nan lo tin 8 mesa di votacion den un localidad mas grandi situa den e mesun edificio unda oficina di e consulado ta situa.

Interes ta grandi
Recientemente durante eleccion di Congreso di Colombia cu a tuma luga luna di maart ultimo tabatin 5 mesa di votacion. Sinembargo durante e periodo di inscripcion di cedula pa bay vota den eleccion presidencial aki a wordo registra un aumento significativo. Esaki a haci cu e cantidad di mesa a aumenta cu tres mas compara cu eleccion ultimo. “Nos ta spera cu e participacion di votado sea masivo.” E cedula mester ta esun di hologram. E unico documento cu ta wordo acepta ta e tipo di cedula aki exclusivamente.

E deseo di e consulado aki ta pa tur ciudadano Colombiano bibando na Aruba cu por vota, lo por eherce e derecho aki di manera liber, transparente y organisa. For di dia cu el a fungi como consul di Colombia na Aruba, el a atende tres eleccion caba, nan ta: Eleccion di 2014, referendum pa paz y eleccion pa Congreso 2018. E ta haya cu e participacion di votado ta casi mesun cos, kiermen un 25% di e censo electoral di alrededor di 5 mil persona. Sinembargo e eleccion presidencial aki a lanta un gran interes cu eventualmente lo premira cu e cifranan di participante lo ta mas halto.

Tin un link riba e website di Canciyeria di Colombia, unda tur hende libremente por wak e cantidad di votado den cada un di sedenan consular di Colombia den exterior. Tambe e personanan cu kier check si nan cedula ta registra pa vota den Consulado di Colombia na Aruba, libremente nan por consulta e website di Registraduria Nacional de Colombia, unda nan ta haya un link pa verifica unda su cedula ta registra. Tambe nan por consulta esaki den e mesun consulado di Colombia.

Consul Gnecco a expresa su gradicimento na tur ciudadano cu a ofrece nan mes di forma boluntario pa participa como hurado di votacion den e eleccion aki. “Berdaderamente e proceso aki ta lanta un gran interes cerca e hendenan. E biaha aki e ta trata di eligi e proximo presidente di Colombia y vice-presidente tambe.”

Finalmente e diplomatico ta afirma un biaha mas su invitacion pa tur Colombiano bin vota, ya cu nan lo haya oportunidad durante e dianan aki for di oranan di mainta tempran te cu oranan di atardi laat, pa eherce nan derecho di voto. Esaki lo tuma luga durante e lapso di un siman for di awe te cu 27 di mei di 8’or di mainta te cu 4’or atardi.