Volvo ta hibando su famoso obsesion pa siguridad na scenarionan cu ta bay mas leu cu e vehiculo di motor mes. E fabricante a asocia cu POC pa desaroya un serie di ‘crash test’ cu helm di ciclista contra e autonan. Ambos empresa a enfatisa cu e iniciativa ta uno pionero na mundo y a destaca su importancia mencionando e popularidad creciente cu coremento di bicicleta tin.
E investigacion ta forma parti di un proyecto mas amplio pa compronde e tipo di golpi cu ciclistanan tin mas chens di sufri den un accident cu un auto. Den e testnan, ta pone e helm POC riba un plataforma y despues ta tiranan na diferente velocidad y angulo contra diferente zona di un Volvo para.
E pruebanan ta basa riba e normanan di siguridad vigente, cu ta obligue e autonan pa busca diseñonan cu ta minimalisa e golpinan ora ta dal contra un ciclista. Esaki ta permiti e investigadonan haci un comparacion directo entre uza of no un helm. Volvo ta spera di mehora e procedemento actual di prueba di e helmnan di bicicleta, cu a ser describi como ‘basta basico’, dor cu ta consisti den laga cay e helm for di diferente haltura, ya sea riba un superficie plat of for di un angulo.
E pruebanan lo yuda POC mehora e siguridad di nan helm pa bicicleta y ta spera di uza e investigacion den nan mesun proceso di diseño di auto. Esaki no ta prome biaha cu ambos compania ta colabora pa mehora e siguridad di ciclistanan. Prome a traha riba un programa piloto cu tabata uza tecnologia pa laga auto y bicicleta ‘papia’ cu otro pa evita dalmento. Tambe Volvo a desaroya un verf cu ta laga e bicicletanan ta mas visibel anochi.
