(AP) — Un volcan den erupcion riba un isla Spaño cerca di nort occidente di Africa a habri dos fisura mas riba su cono riba diabierna ultimo cu a saca lava, cu autoridadnan reportando actividad ‘intenso’ den e area.
E fisuranan nobo, alrededor di 15 meter apart, a manda jetnan di piedra smelt cora y oraño abao den direccion di lama, paralel na un fluho anterior cu a alcansa ocean Atlantico anteriormente siman pasa.
E volcan tabata ‘hopi mas agresivo’, casi dos siman desde cu el a haci erupcion riba e isla di La Palma, segun Miguel Angel Morcuende, director tecnico di e departamento di respuesta di emergencia pa volcan di e Islas Canarias.
Un dia pa otro, cientificonan a registra ocho temblor nobo di magnitud hasta 3.5. E erupcion tabata mandando gas y shinishi hasta 6mil meter den laira, segun oficialnan.
E rapido evacuacion di mas di 6mil persona desde e erupcion dia 19 di september a yuda preveni casualidadnan.
Un area nobo di lava solidifica unda e piedra cu a smelt ta core den lama ta extende mas di 20 hectar.
Oficialnan tabata monitoreando calidad di aire den costa. Nivelnan di dioxido di sulfur den e area a aumenta pero no a presenta un menasa pa salud, segun gobierno di La Palma.
Sinembargo, a conseha residentenan local pa keda paden. Tambe a recomenda pa hende riba e isla bista tapaboca y proteccion pa wowo contra e caidanan pisa di shinishi volcanico.
E volcan te awo a emiti alrededor di 80 miyon meter cubico di piedra smelt, cientificonan ta calcula – mas di dobel e cantidad di e ultimo erupcion na e isla, na 1971.
E lava te awo a destrui of parcialmente destrui mas di mil edificio, incluyendo cas y infrastructura di agrigultura, y a dera alrededor di 709 hectar.
La Palma, cas na alrededor di 85mil persona cu ta biba principalmente di agricultura di fruta y turismo, ta parti di e volcanico Islas Canarias, un archipielago cerca di Africa cu ta parti di teritorio Spaño. E isla ta alrededor di 35km largo y 20 kilometer hancho na su punto mas amplio. Bida a continua normal riba mayoria di e isla mientras e volcan ta activo.
