Voicenote den prensa ‘na cierto extento’ tabata causa: Vanessa Kock ta tuma luga di Andrew Hoo na cabes di KPA

Ayera atardi vocero di ministerio di Husticia a anuncia por medio di un comunicado cu minister di Husticia, Andin Bikker (POR) a anuncia cu Vanessa Kock lo bira Alto Comisario suplente y cu Andrew Hoo lo haya otro encargo den gobierno. Riba pregunta di Bon Dia, vocero a contesta cu e echo cu cierto prensa a leak un voice note di Hoo lo ta ‘na cierto extento’ relaciona cu e bahamento di Hoo for di e puesto.

E voicenote cu sea parcialmente of completamente a conduci na e decision pa kita Hoo di su encargo a aparece pa prome biaha antayera riba Diario TV su pagina di Facebook. Den e voicenote Hoo ta bisa lo siguiente: “Tito bon dia. Djis pa bo sa, mi a papia cu Baboe aworey. Tin mentiranan ta wordo papia di mi cu den e BT overleg ta ami a vota contra. E ta net omgekeerd. Ami cu un otro kluster ta e uniconan cu a vota pro. Nan ta purba tira mi under the bus. Mi a papia cu Baboe y e lo bay check e notulen pa confirma cu ta ami so a vota pro. Mi a hasta argumenta esaki y mi a wordo tilda di wordo omgekopen door di prensa. Kiermen e storia ey no ta cuadra, cu ami ta vota contra bosonan. E argumentonan bo tin cu hiba nan MinPres, pasobra MinPres tin e ultimo palabra. Ami a bringa te unda mi por. Mi sa e belang di prensa y p’esey mi a trece e argumento dilanti. No cu mi ta liga na niun hende, ta djis ami ta wak e belang, mescos boso ta wak e belang di prensa pa verslaggeving. Pero ya, tin otro hende no ta wak e asina. Bo tin mi permiso pa share mi voicenote cu e otronan pasobra mi no ta eens cu ami ta wordo tilda cu ami a vota contra bosonan.”

E situacion cu Hoo a describi den e voicenote ta relaciona cu e hecho cu no a haci excepcion pa prensa por haci su trabou durante toque de queda. Manera nos a yega di publica, periodistanan local a bay den protesta pa asina por yega na un areglo unda tanto gobierno como prensa ta keda contento, pa asina considera trabou di prensa y periodista como un trabou ‘esencial’, manera ta haci na otro paisnan manera Hulanda y paisnan Latino Americano.

Por lo pronto no tin ningun informacion pa indica den ki puesto lo pone Hoo, manera e comunicado a informa. Minister di husticia a gradici Hoo pa su 2 añanan di servicio y e comunicado ta indica cu Hoo a mustra comprension pa e decision cu Bikker a tuma. Señora Comisario Tjon-Kock lo bira Alto Comisario suplente, pendiente un procedura di solicitacion pa haya e proximo Korpschef de facto.