Dia 25 di september Santa rosa ta bay tin su Marshe, despues cu for di 2018 cu tabatin e ultimo mercado na Santa Rosa no a haci esaki mas. Tur hende ta na altura cu Aruba a pasa den momentonan dificil y esaki tambe a conta pa Santa Rosa unda cu tambe a cera su portanan pa tur actividad. Mirando e situacion a opta pa warda un rato pa a mira e desaroyonan cu mester a tuma luga.
Pero awor cu casi tur cos ta tras di lomba, vocero di Santa Rosa Randy Maduro ta duna di conoce cu Santa Rosa ta cla pa e mercado Santa Rosa. E actividad lo tuma luga na Santa Rosa mes cu ta na Piedraplat 34 A manera semper unda cu a organisa e mercado un biaha mas ta bay tin diferente frutanan y berduranan fresco produci pa nos mes productornan local. Lo bay mira diferente standnan cu diferente productonan unda cu tin remedinan di tera , fruta, berdura, pasa boca di Aruba y cuminda crioyo.
E biaha aki e mercado lo tuma luga patras di edificio di Santa Rosa unda cu lo tin hopi sombra di e propio matanan cu Santa Rosa tin planta y asina ta sfeer ta algo diferente cu e calor di naturalesa. Esunnan cu ta desea di forma parti di e mercado lo mester paga solamente 25 florin pa asina participa hunto cu e otro standnan y ofrece bo productonan fresco.
E ambiente familiar cu Santa Rosa ta ofrece ta uni unico, tur hende ta cordialmente invita pa dia 25 di september pa 8 or di mainta te cu 1 or di merdia. Santa Rosa ta contento mirando cu den e dos añanan cu no tabata organisa e mercado, awor ta hopi ta e solicitud pa productonan fresco, aunke cu e Pandemia tabata malo, di otro banda e la cende un luz den hopi di e productornan local y tambe e individualnan cu kisas awor aki ta mas consciente di planta bo mes un fruta y berdura. E Pandemia a bin cu su cosnan malo pero di otro banda a haci un conscientisacion unda cu ta pusha e ciudadanonan pa nan ta mas consciente cu nan tambe por planta den nan cura di cas.
Santa Rosa pa hopi tempo a enfoca den e persona pa e por planta den un scala mas chikito tur locual cu e ta uza den su cushina tur dia, porehempel tomati fresco, promenton, yerbe di hole, selder ta berduranan cu ta ser uza den cushina cu cada ciudadano mes por produci den nan cura. Durante di Pandemia hopi hende ta na cas y por bisa cu hopi hende a purba di haci cosnan diferente y a sa mas di plantacion propio den cura.
