Na inicio di e virus COVID -19 no tabata necesario pa vacuna mucha, sinembargo na momento cu e virus a sigui desaroya varios cambio mester tuma luga. Actualmente Aruba ta ricibi conseho di Hulanda abase di investigacionnan y e resultado ta haya e aprobacion pa vacuna diferente otro gruponan di meta .
Tambe na inicio a bisa cu hende muhe na estado no por haya vacuna, pero awo despues di e investigacion a haya e aprobacion pa e personanan na estado tambe haya e vacuna. Na momento cu e mama haya e vacuna e ta pasa esaki over tambe na e baby y na momento cu e baby nace ya e tambe ta protegi contra COVID. Na e momentonan aki hende na estado tambe por keda vacuna segun vocero di salubridad publico Jurette Croes.
Tin algun pais cu ya caba a cuminsa vacuna esunnan cu ta bao di 18 aña y probablemente Aruba tambe lo mester cuminsa haci e paso aki. Aruba actualmente ta warda riba e aprobacion di Hulanda pa asina tambe cuminsa vacuna muchanan bao di 18 te cu 16 aña. Tin algun pais a cuminsa cu hasta muchanan di 12 aña , pero Aruba no por haci e stap aki ainda debi cu ta warda riba e autoridadnan cu lo mester duna e pruebanan necesario cu lo aproba pa e parti aki di grupo di muchanan cu tambe lo mester keda vacuna. Di e manera aki tambe poco poco lo keda baha e edad di personanan cu mester haya vacuna.
Na e momentonan aki e vacuna ta gratis , e campaña di vacunacion aki no ta bay keda pa semper den e structura aki. Segun vocero di DVG Jurette Croes ta bay yega un momento cu e departamento di dienst besmetelijke ziekte lo bay tuma e proceso di e vacuna aki over y e lo bira un vacuna mescos cu gelekoorts,influenza , hepatitis,na momento cu mester biaha pais nan ta exigi esaki y e ora e ciudadano lo mester tuma su prik na DBZ y probablemente lo mester paga pe tambe.
Pero tampoco lo e no ta bay ta un vacuna cu lo por ricibi asina facil manera cu ta na e momentonan aki. Na momento cu un persona ta bay biaha y e pais ta exigi e prueba di e vacunanan aki si e persona no tin su vacunanan tuma e lo mester bay haci un cita y tanten cu no tin 6 persona riba lista pa haya e vacuna e persona lo tin cu warda.
E proceso aki ta bay bira un poco mas dificil y pesey mes e conseho ta pa cada persona busca e vacuna na e momentonan aki cu e ta gratis y ta hopi facil pa por ricibi esaki y alabes na momento cu tin e dos dosis nan e persona tin su prueba tambe cu a ricibi e dos dosis nan y asina no ta haya ningun problema na momento cu mester bay biaha.
Tin algun pais a cuminsa flexibilisa nan medidanan caba unda cu si un persona mester biaha y cu nan tin nan dos dosis nan no lo mester test. tuma e vacuna ta faborece e ciudadano den diferente factor, motibo, rason nan y principalmente bo mes un salud. Segun vocero di DVG manera WHO a informa COVID ta full rond mundo y e ta endemico cu ta significa cu mundo nunca mas lo sali of deshaci di e virus di COVID . Esaki ta significa cu nos tur mester sigui proteha nos mes di e COVID cu ta presente rond mundo y na Aruba tambe.
