Vocero di DPL, sr. Richenel Stamper: “DPL no ta duna trabou”

Un punto cu vocero di Departamento di Progreso Laboral (DPL), sr. Richenel Stamper a trece dilanti durante un entrevista cu Bon Dia Aruba tin di haber cu e departamento aki no ta un dunado di trabou. Nan ta un intermediario entre e grupo di dunado di trabou y e grupo di buscado di trabou. “DPL no ta duna trabou”, el a bisa.

El a indica cu ta existi un critica cu no ta esun mas obhetivo caminda tin hende cu ta bisa cu nan a bay DPL, pero “DPL no a duna mi trabou”. Locual DPL ta haci ta prepara e candidato pa busca trabou. Nan ta duna bo tur informacion, nan ta percura pa bo haya directamente un entrevista y no pa yena un aplicacion. Sinembargo el a indica cu DPL no ta esun cu ta scoge ken ta haya e trabou, ya cu esaki ta keda na e dunado di trabou pa scoge ken ta e miho candidato.   

Sr. Stamper a haci un yamada na e trahado local (Hulandes of esun cu tin firma liber) cu  ta buscado trabou pero cu nunca a tende di DPL of cu nan no a pasa pa registra nan mes como un buscado di trabou pa haci esaki cerca nan. Bo no mester paga nada pa registra y pa yega na un trabou.  

El a agrega cu e registracion aki ta na bienestar di e mesun trahado y  tambe di nos pais. DPL ta wak e mercado laboral y e posibilidad di aya un trabou como parti di participacion ya cu cada persona cu ta haya un trabou ta participa den nos economia y esaki ta beneficioso pa nos pais.

“Mas hopi hende tin un trabou, menos problema entre otro financiero lo tin na Aruba”, el a declara.

Den nan grupo di meta nan tin hende di tur edad fei 18 aña pariba solicitando pa un trabou y nan ta DPL ta intermedia pa trabou di 8 ora ya cu masha poco na  ta intermedia pa vacatura cu ta parttime.