Sr. Edward McCollum, kende a identifica su mes como vocero di Consulado Dominicano na Aruba, y tambe encarga cu e departamento comercial, a reacciona riba un manifiesto entrega pa e grupo ‘Dominicanos Unidos en Aruba’, riba dia 10 di juni ultimo.

El a bisa cu nan ta dunando contesta como consulado manera mester ta. Nan kier evita bruhamento y e ta haya cu e documento aki por trece esaki. Igualmente el a laga sa cu e documento aki a wordo manda pa Canciyeria di Republica Dominicana pa duna contesta, ya cu un grupo di ciudadano Dominicano tin nan inkietud, pero no henter e poblacion Dominicano na Aruba.

E manifiesto aki ta contene varios punto, entre nan e solicitud pa consul general actual, Victor Comprés Rosario presenta su renuncia pa abandono di su funcion. Nan ta denuncia cu e diplomatico tin varios luna afo, sin eherce su funcion consular.

Durante un conferencia di prensa cu a tuma luga den e sede di Fundacion Juan Pablo Duarte, Sr. McCollum a trata e puntonan di keho cu e grupo menciona a trece dilanti. El a lamenta cu no por duna un contesta por escrito, pasobra den e documento entrega no ta aparece niun adres. E ta lamenta tambe cu den e grupo aki tin persona cu nunca a bishita e consulado. Pero awor nan kier bin cu un protesta na nomber di comunidad Dominicano na Aruba. “Esaki ta falso!” el a bisa.

Ademas e ta haya cu e documento entrega tin shete firma di cual dos so nan por lesa, pero no tin ID, pues e ta cualifica e documento aki como ‘no valido’, ya cu e grupo aki no ta uno institui. Encuanto e anuncio di e grupo aki di realisa un accion di firma pa pidi e renuncia di e consul, el a bisa cu e ta ‘exorta pa nan hacie, pasobra cada hende tin su derecho’.

El a bisa cu e discusion aki ta entre ‘nan y e consul’. Pero e ta haya cu como miembro di e consulado e ta defende e consul actual. Pasobra e diplomatico a haci su best pa bin Aruba bek. Pero e ta haya cu ‘nan no a haci kimica cu e consul’.

El a bisa cu e consulado ta habri pa atende e inkietud y keho di tur Dominicano na Aruba. “Nos ta e representante number uno cu ta defende e Dominicano residente na Aruba,” el a bisa. Un punto cu el a duna basta atencion tin di haci cu e consul mes. El a bisa cu e informacion y fecha cu e grupo ‘Dominicanos Unidos en Aruba’ a bin cune no ta corecto y nan ta invalido. Ya cu e consul a yega di bin Aruba durante luna di november, parti di december y na luna di januari tambe. Segun McCollum, e consul a yega di bin y tambe sali di Aruba alrededor di casi 12 biaha. E ultimo biaha tabata na principio di luna di maart.

El a splica cu e motibo cu e diplomatico no ta actualmente na Aruba durante casi tres luna ta debi na e crisis di Covid. E propio gobierno di Aruba lo habri su frontera cu e region di Caribe menos cu Republica Dominicana y Haiti. “E ta imposibel pasobra no ta existi un vuelo humanitario,” el a declara. Esaki ta e motibo cu e consul no por bin Aruba.

Igualmente gobierno di Aruba mes no por a logra pa nan ciudadanonan Arubiano y residente den e isla aki cu ta pega na Republica Dominicana por bin bek. Pero si e consulado a logra un vuelo pa e Dominicanonan pega na Aruba por bay nan pais bek, el a declara.