Diadomingo movemento social Dominicano “Marcha Verde” a cende un antorcha como un simbolo di e recorido cu ta cuminsa awe alrededor di henter e pais, cu obhetivo di solicita un castigo y aplicacion di husticia pa tur hende cu ta envolvi den e caso di soborno di Odebrecht. E empresa di Brasil a acepta cu nan a paga hopi soborno na Republica Dominicana.

E grupo a cende e vlam berde na sector di Capotillo, na provincia di Dajabon, situa na noreste di Republica Dominicana. Na Capotillo, pueblo Dominicano a cuminsa na 1861 e guera di restauracion contra Spaña. “E vlam berde ta biaha atraves di e principal provincia y pueblonan di Republica Dominicana, pa ilumina caminda di e movimento ciudadano, como garantia di logra cu patria di Juan Pablo Duarte y pueblo di restauradornan por libera nan mes di e regimen corupcion y di impunidad cu ta oprimi nos” Mario Serrano, dirigente di Marcha Verde a bisa.

Den un documento di prensa e dirigente Serrano a recorda cu e grupo di Marcha Verde ta reclama husticia pa tur hende envolvi den e caso Odebrecht, y e recuperacion di e placa cu nan a horta via di soborno y sobrevaluacion, y cancelacion di tur contracto di e empresa di Brasil, Odebrecht. E programa di movimento y actividad di grupo Marcha Verde ta cuminsa awe hunto cu actividad cu ta cuminsa na poblacion di Barahona (suroeste); Valverde (noreste) y Higüey (este), pa asina por recore henter pais y finalisa cu un concentracion na Santo Domingo dia 19 di maart proximo.

Grupo di Marcha Verde a invita tur comunidad pa bay na e actividad cu nan a yama “Vlam Berde” y asina tambe a invitanan pa conta tur nan problema y reclamonan eyden. E grupo aki ta pensa cu tur problema di Republica Dominicana ta resultado di robo di placa di e pais aki di banda di politiconan cu ta participa den caso di corupcion, manera esun di Odebrecht. Nan a haci yamado pa sali cu un bela, un palo cu luz, un lampi di gas o cualkier vlam cu por expresa e boluntad di caba cu impunidad y corupcion cu ta bin for di e mesun palacio nacional”

E grupo aki a ser forma varios siman despues cu departamento di husticia di Merca a bisa cu Odebrecht a acepta cu nan a paga 788 miyon dollar na soborno na mas di 12 pais di America Latino y Africa. Informacion ta bisa cu Odebrecht a paga 92 miyon dollar na Republica Dominicana.