Vivienda adecuado y moderno ta fundeshi pa un tercer edad saludabel, feliz y social. Na Aruba tin un falta grandi pa vivienda asina pa adultonan mayor. Pa e motibo aki Gobierno di Aruba a acorda cu lo pone fondonan disponibel pa construccion di vivienda pa nos grandinan.
“Nos ta bay stop di traha cas pa nos grandinan. Awo nos ta cuminsa traha hogar pa nan,” segun Minister di Asuntonan di Adulto Mayor, Ursell Arends. “Ora nos pensa riba vivienda nos mester pensa mas lew cu simplemente pone bloki riba otro. Esnan cu yega na edadnan bunita merece di tin un hogar. Nos no por simplemente duna nan un cas y laga nan bay biba den isolacion. Un bida solitario y sin atencion adecuado no ta saludabel pa ningun hende. Esey no por ta un bida feliz,” Minister Arends ta expresa. Den bista di minister, e aspecto social mester ta parti integral ora ta papia di vivienda moderno.
Gobierno di Aruba lo pone alrededor di 20 miyon florin disponibel pa FCCA den forma di un prestamo. Meta di esaki ta pa nan por traha mas viviendanan social. Di parti di su ministerio, Minister Arends a pone como punto di salida cu por lo menos 25% di esaki mester ta dirigi na construccion di vivienda pa esnan di edad avansa. Esaki ta un forma concreto pa realisa parti di un vision mas amplio.
“Vivienda ta un fundeshi. Pero e ta alabes un instrumento cu nos por uza pa bringa isolacion bou nos grandinan. Vivienda moderno ta haci un ambiente social posibel,” segun Minister Arends a splica. Minister ta referi aki na e ‘Deltaplan’ cual ta e plan integral di e ministerio pa adultonan mayor. Den e plan aki ta pone enfasis riba e pensamento di ‘sociale benadering’, basa riba e pensamento cu salud mental ta mes valioso cu salud fisico. A haci hopi avance riba e parti curativo, pero awo mester mas atencion pa e parti preventivo.
Minister Arends a expresa su aprecio na FCCA cu ta comparti importancia pa traha casnan special pa adultonan mayor. “FCCA ta un partner importante pa nos. Semper nan a mustra di ta disponibel pa yuda nos riba tereno di adultonan mayor,” minister a bisa. Durante un recorido hunto cu FCCA di diferente casnan di adulto mayor e minister a confirma cu FCCA ta e trend-setter na Aruba riba e tereno aki y nan proyectonan ta mustra otro inversionistanan cu proyectonan asina tambe ta factibel.
“Mi kier pa banconan comercial tambe tuma nota, cu aki ta unda falta hopi inversion. Nan tambe tin un rol social y lo ta bon pa nan cuminsa pensa con nan por contribui na un forma mas amplio na tipo di proyectonan asina. Trahando hunto nos por logra mas,” minister a enfatisa.
Asunto di vivienda tabata un topico principal den e Foro Nacional pa Adultonan Mayor na october 2023. Aki tabata tin un presentacion amplio di Sr. Gijsbert van Herk, kende ta lidera Staedion cu ta opera mas di 40 mil cas na Den Haag y vecindario. Den esaki nan a specialisa riba tereno di cas pa adultonan mayor. Segun Minister Arends, cu guia di Staedion nos no mester inventa e wiel, pero nos lo por scoge esun cu ta pas miho pa nos.
Den e vision di Minister Arends, a reparti asunto di vivienda pa Adulto Mayor den 5 grupo di atencion. Tin un grupo cu kier keda den nan propio hogar, pa esey ta trahando diferente forma pa reforsa y asisti e cuidadornan (mantelzorg). Tin un grupo den casnan di cuido y pa esaki tin diferente proyectonan andando pa reforsa e servicio y garantisa calidad.
Tin esnan cu kier desaroya proyectonan comercial, y aki e tarea di ministerio ta pa stimula y facilita proyectonan asina. Pa e grupo cu mester di asistencia na nivel di verpleeghuizen ta preparando un plan integral pa amplia e cantidad. Y pa tur adulto mayor lo tin facilidad tambe di dagverblijf, cual ta e proyecto di Pasadia cu ta creciendo tur dia.
“E necesidad ta grandi y mi ta desea di por a haci hopi mas y mas lihe. Pero realidad ta cu prome cu nos por cosecha, nos mester cuminsa na planta simia, despues stimula crecemento pa finalmente disfruta di e fruta di e labor,” Minister Arends a remarca.
