Viuda di embahador di Grecia na Brasil a declara su inocencia den un carta publica diaranson cu a pasa den diario di Grecia Ethnos. E viuda ta señala pa polis como e persona cu a instiga e crimen contra su casa, na fin di luna di december. “Mi ta declara cu mi inocente dilanti di pueblo di Grecia, mi ta victima di un investigacion inhusto y prehuicia di banda di polis di Brasil”, Françoise de Souza Oliveira a skirbi den un e-mail cu a manda pa embahada di Grecia na Brasil. For di e e-mail ey, e diario Ethnos a tuma un parti y a publica e noticia aki.
E señora ta sospechoso y a ser deteni 31 di december ultimo pa polis di Brasil. Souza Oliveira ta haci un yamado na tur autoridad di Grecia pa tuma responsabilidad y cuido di su yiu muhe di 10 aña, cu segun e señora ta bao responsabilidad di un persona cu ta famia cerca di nan. De Souza Oliveira a ser acusa pa polis di Rio di Janeiro pa planifica e asesinato di su casa Kyriakos Amiridis di 59 aña, na Rio di Janeiro hunto cu Sergio Gomes Moreira, polis militar di 29 aña cu ta conoci como su amante. Segun polis di Brasil e pareha a organisa e crimen pasional aki, cu ayudo di un primo di su amante, Eduardo Moreira di Melo, di 24 aña cu a ser deteni tambe pa polis di Rio di Janeiro. E caso a bira conoci ora cu e casa di embahador a duna cuenta di su desaparicion, tempo cu nan tabata disfruta par di dia di vacacion hunto cu nan yiu na nan residencia secundario cu ta situa na norte di Rio. Polis a pone tur declaracion na duda despues cu a descubri e curpa di e embahador totalmente kima, dia 30 di december den e auto cu cual el a sali for di su cas. Segun investigacion di polis di Rio di Janeiro e diplomatico a purba di defende su mes prome cu el a ser asesina cu un bala, cu un arma cu tabata registra na armeria di embahada di Grecia.
