Eduardo Cabra di Calle 13 ta eliminando su personahe di Visitante den un video grafico nobo, cu ta sirbi como lansamento di su carera solo y su label nobo.

E artista awo lo ser conoci simplemente como Cabra. E debut no a yega sin drama sanger. Den ‘La Cabra Jala Pal Monte’, filma pre-pandemia na Argentina pero lansa diabierna, un homber bisti na preto di cabes te pia y cu su cara cubri ta corta garganta di Visitante prome cu kita su hood pa revela su identidad: Cabra mes.

“Sin Cabra no tin Visitante”, ta canta e ganado di 28 Grammy Latino y Grammy for di Puerto Rico den e cantica, cual su titulo – literalmente traduci como ‘e cabrito ta bay pa e cero’ – ta fia di e dicho Latino Americano tocante bolbe na nos origen. “Mi no ta mir’e como morto,” e productor veterano a bisa AP diabierna for di su studio na San Juan. “Mi ta mir’e como Cabra semper tabat’ey.”

Cabra a logra fama y reconocemento den cuminsamento di añanan 2000 como parti di Calle 13, un duo cu el a forma cu su ruman Rene Perez, aka Residente. Mientras Perez tabata e voz di e grupo, Visitante di Cabra tabata su productor y director musical. A traves di añanan, el a desempeña varios otro rol: productor di otro artista, compositor di musica original di pelicula, creador di Trending Tropics (un duo cu Vicente Gargia). E idea di laga atras su apodo famoso, el a bisa, ta pa consolida tur e aspectonan ey di su mes.

‘La Cabra Jala Pal Monte’ no ta solamente su prome cantica como vocalista principal, sino e prome lansamento di su label independiente nobo, La Casa del Sombrero, basa na San Juan. Esaki, de hecho, ta locual mas tabata emocion’e. “E asunto di independencia den e temponan cu nos ta bibando, unda musica di coriente principal a bira como un zonido singular.”

Su plan inmediato pa e label ta inclui traha cu compositor Portoriqueño, Sebastian Otero y investiga musica jibara pa asina crea un ‘documento audiovisual’ tocante e genero folklorico di e isla.

Poniendo su mes dilanti microfon y e camara como e lider a pone Cabra sinti ‘vulnerabel y super insigur’, algo cu el a bisa a yud’e ta mas comprensivo como productor. “Por ta mi lo purba ta un tiki mas sensitivo na momento di traha cu otro hende”, el a bisa. “Awo, si mi wak un hende como un productor, mi por compronde kico nan ta pasando y purba di conecta cu esey.”

Otro luna e lo ta lansando mas musica como Cabra e soloista, pero mesora e ta aclaria cu e ta haciendo esaki ‘sin ningun expectativa’. “Mi ta haciendo esaki pasobra mi kier sigui haci loke mi ta haci, cual ta produci, lansa proyectonan nobo, colabora cu hende cu mi gusta”, el a bisa. “Esaki ta consolida tur loke mi ta haci, pero mi ta haci nan awo bou di un solo sombre.”