Fundacion Respeta Mi hunto cu 4 otro organisacion a bin cu meta pa ‘lantamento di mucha’ pa comparti e trabou cu ta hibando actualmente den tereno social.

E vision pedagogico ta: Na Aruba un mayor ta percura pa nan yiu por crece den un ambiente pedagogico optimal, den un famia afectivo y stabiel y den un bario cu ta tene cuenta cu mucha.

Yvonne Geerman Bermudes ortopedagogo director sociale zaken, Yanelis Jimenez y Mima Lampe director SPCOA a papia riba e tema aki durante di conferencia di prensa cu a tuma luga ayera atardi.

Taskforce

Sra. Geerman a splica cu desde april 2014 a instala instala un Taskforce Derecho di mucha cu ta consisti di un representante di tur isla den Reino y Hulanda. Den e plan di trabou di Taskforce a deliña algun aspectonan cu lo a atende di un forma colectivo. Un di e aspectonan cu sigur kier promove den bienestar di e muchanan, ta e lantamento di mucha riba un forma positivo.

Sra. Geerman ta splica cu cada isla lo desaroya un vision pedagogico un plan di accion pa nan Isla.Aruba na su turno a scoge pa desde april 2016 traha cu un comision, cu tin como tarea pa bin cu un vision pedagogico y un plan di accion pa Aruba. E comision aki ta consisti di 5 diferente organisacion, Departamento di Asunto Social, Fundacion Pa Nos Muchanan, Stg. Wit Gele Kruis Aruba, Fundacion Respeta Mi y Tienda di Educacion.

Segun sra. Geerman ta bisa cu e organisacionnan aki ta traha diariamente cu mayornan y ta duna un sosten na nan cu cualkier pregunta of problema den e tereno di lantamento di mucha

6 puntonan di atencion

E comision a haci uzo di diferente fuente di informacion pa motibo di esaki a bin cu 6 puntonan basico: 1. lanta yiu den un ambiente sigur y cu amor, 2. sosten positivo, 3. expectativa realistico, 4. disciplina positivo, 5. cuida bo mes bon, 6. busca sosten y ayudo.

E ta sigui splica cu pa motibo di e 6 punto aki nan kier conscientisa e pueblo di Aruba den e proximo dos aña pa duna importancia y pa pone e muchanan central. Esaki ta formula un vision pedagogico y plan di accion pa Aruba.

Henter e plan aki a wordo presenta den ultimo conferencia na luna di mei na Curaçao. “E vision pedagogico ta na Aruba e mayor o educador ta percura pa un mucha por crece den un ambiente pedagogico optimal den un famia afectivo y sigur y un bario cu ta tene cuenta cu mucha”, asina sra. Geerman ta aclara.

Segun sra. Geerman ta bisa cu pa medio di educacion positivo asina e mucha ta wordo guia mas miho den su desaroyo pa bira un adulto, independiente y responsabel. E mucha mester tin siguridad emocional, desaroya habilidad social y personal, tambe pa siña balor y norma.

E organisacionnan a bin cu diferente material asina introduci e vision na comunidad di posternan, di foldernan te cu un video pa promove e 6 puntonan. E lo wordo introduci riba red social, via canal di television y den cinema.

Sra. Geerman a splica cu e plan di accion lo sigui, lo organisa encuentro y campañanan pa mayornan y educadornan. Na september venidero lo organisa dos dia di informacion riba e tereno social pa e profesionalnan y docentenan.

Cu esaki e organisacion kier alcansa tur e mayornan, profesional, docente cu ta envolvi den e bida di e muchanan aki na Aruba asina sra. Geerman a remarca.

Yanelis Jimenez cu ta un ‘preventiemederwerker’ na fundacion Respeta Mi a splica cu e meta di e conferencia na Curaçao cu a tuma luga na luna di mei tabata un intercambio di experiencia, na unda cada pais mester a crea un plan di accion.

E delegacion a consisti di 17 diferente organisacion sea gubernamental y no gubernamental. Cada mandatario presente mester a firma un declaracion di intencion di cual ta compromete di duna sosten na e proceso cu ta bay continua.

Na final di conferencia Mimi Lampe director general di ‘stichting protestant christelijk onderwijs Aruba a comparti cu e vision aki mester wordo carga pa henter comunidad di Aruba asina esaki por wordo realisa.