Diamars partido Pueblo Orguyoso y Respeta (POR) a publica nan plan di gobernacion. E programa completo di 74 pagina ta disponibel riba pagina di Facebook di POR E Forsa y ta disponibel por medio di version di PDF pa tur esnan cu no tin Facebook. E articulo aki ta un sinopsis di e puntonan cu ta resalta den e programa. E programa ta e resultado di a scucha y compronde loke pueblo ta desea.

Husticia
Mirando cu nos prioridad number 1 ta combati criminalidad, POR ta enfoca fuertemente riba e restauracion di  seguridad. Esaki ta encera, prevencion social, proteccion di nos fronteranan, restructuracion y tecnificacion di nos cuerpo policial, duna e atencion necesario y den tur aspecto atencion na maltrato y abuso sexual di menor, combatimento di drogadiccion. Igualmente lo enfoca riba rehabilitacion y resocialisacion, modernisacion di nos leynan pa combati abuso di animal, reformulacion di maneho migratorio y como base tur esaki e  modernisacion di nos leynan.

Salud
Salud ta un di e problemanan cu merece mas atencion na Aruba. POR ta para pa e principio cu tur ciudadano tin e derecho pa tin un sistema di salud di calidad. Ta bay reduci e lista di espera pa specialistanan y lo duna mas atencion na prevencion. Ta considera nos grandinan como un parti hopi importante di nos poblacion pues ofrecenan tanto centronan specialisa como programanan di cuido. POR ta presenta un programa pa ofrece e ciudadadonan cu tin mester un cuido mental di calidad.

Deporte
Stimula un bida sano y activo ta un necesidad na Aruba. Profesionalisacion di deporte  aumenta y duna prioridad di fondonan. promociona deporte riba tur nivel. Mehora acceso na facilidadnan deportivo y conscientisa comunidad riba e importancia di deporte.

Infrastructura
Den infrastructura POR ta bisa bon cla: nos ta para pa un maneho balansa, husto y transparente. Prome lo ta bay optimalisa e proceso di otorgamento di tereno desaroya proyectonan di vivienda social y implementa e ley di zonificacion.

Medio Ambiente
Calidad di bida di nos hendenan ta loke ta den wega na e momentonan aki  nos ta bay mehora e cuadro legislativo implementando un maneho integral y mas  cu claro, mehora control y sancionnan necesario pero tambe ta importante pa conscientisa comunidad a traves di programanan. Obviamente mester soluciona rapidamente e problematica di dump na Parkietenbos y tur e dumpnan  ilegal. Parke marino conhuntamente cu proteccion di nos flora y fauna ta ocupa un posicion halto den nos propuesta, como tambe e promocion di energia alternativo y mehora e relacionnan cu tur instancia no gubernamental.

Asuntonan social
Ora nos atende e situacion di asuntonan social, cu nos ta opina cu ta e motor tras di nos propuesta di cambio, nos ta bay motiva e cobradonan di onderstand pa subi  mercado laboral y naturalmente  proteccion di derecho di mucha ta un mester, como tambe introduccion di creche social. Restructuracion di DAS ta importante, mescos cu promocion e integracion social. Reforsa posicion di centronan di bario y educacion social ta bay introduci e sistema di ‘reverse mortage’ y introduccion di ley pa reorganisa debe personal. Implementacion finalmente di defensor di pueblo y di mucha. Legalmente mester bin cu e proteccion di derecho di personanan cu limitacion. Tur esaki ta cuadra directamente cu educacion.

Otro topiconan cu ta resalta den e ‘Vision 17-21 Hunto nos POR’ ta educacion, economia, finansas publico, integridad, transparencia y bon gobernacion, cultura, sector primario y transporte. Den e proximo articulo lo trata e puntonan aki.