Januari 2017 a habri cu hopi hende, tanto mucha como adultonan, ta presentando disfonia of laringitis.
Esaki Departamento di Salud Publico ta informa.
Disfonia of laringitis ta presenta na momento cu un virus infecta e laringe, cu ta un organo, situa den e garganta y tambe e amandelnan, causando asina inflamacion di e cuerdenan vocal, esta bo stem. E sintomanan cu por presenta ta dolor di garganta, garganta seco y ta kishiki, stem hees, keintura y dolor ora ta guli. Ta comun cu laringitis por presenta hunto cu algun otro infeccion manera griep, verkoud of sinusitis. Mayoria di laringitis viral ta presenta inespera y ta dura menos di 3 siman. Den e prome siman di e sintomanan, laringitis viral ta hopi contagioso via aire ora un persona cu tin e infeccion tosa, nister of papia. Laringitis mayoria di biaha ta cura di su mes dentro di 1 pa 2 siman. Departamento di Salud Publico ta conseha pashent entre otro pa bebe hopi, no consumi alcohol y si e sintomanan ta persisti mas cu 2 siman, pa bay dokter di cas. Tambe nan ta conseha personanan cu ta sufri di malesanan cronico, manera di curason, diabetes, problema cu canal respiratorio (pe asma) of alergia pa tuma contacto cu nan doctor di cas pa instruccion specifico.
Evita di haya
E departamento tambe ta duna conseho pa evita di haya laringitis: “Tapa boca y nanishi ora di tosa of nister cu un lenso di papel of haci esaki den bo elleboog. Laba man frecuentemente cu awa y habon of uza hand sanitizer. Evita bay unda tin aglomeracion di hende y preferibel tin bo propio forki, cuchara of glas pa bo no tin pa uza di otro hende.”
