Hospital Pablo Tobón Uribe ta un di e cuater institucionnan di salud di Medellin cu a forma parti di un delegacion di ProColombia cu a bin recientemente pa ofrece nan servicio na henter comunidad di Aruba.
Nan ta un institucion priva cu un structura di fundacion sin animo di haci placa, sino teniendo e pashent central. P’esey den nan 45 aña di existencia nan ta wordo conoci como: Un Hospital Cu Alma.
Pashent internacional
Sra. Juanita Estrada Plata kende ta hefe di marketing di e hospital aki a declara na Bon Dia Aruba cu nan tin un oficina cu ta traha specialmente cu e pashentnan internacional.
Nan tin mas cu 10 aña di experiencia atendiendo pashent internacional, specialmente di nos region Caribense, y muy particularmente pashentnan di Aruba y otro islanan di e Reino Hulandes. Nan ta atende aproximadamente 1.400 pashent internacional pa aña y 14.600 pashent di Colombia mes.
E hospital aki a habri e porta di un infrastructura hospitalario moderno cu ta cumpli cu standard di siguridad internacional. Nan tin 382 cama nobo cu espacio special adapta y condiciona cu sala di spera, Internet, T.v., etc… pa pashentnan internacional y nan acompañante
Zika
Un preocupacion cu ta existi cerca e pashentnan internacional tin di haber cu menasa di e virus di Zika, cu ta afecta diferente pais den nos region, entre nan Colombia. Nan ta sigura cu Medellin ta safe, pasobra aunke a wordo raporta casonan di Zika, nan ta minimo. Tur hende mester adopta e medida preventivo pa evita cu eventualmente un sangura infecta cu Zika, lo por transmiti e virus aki.
Tratamento di complehidad halto
Nan ta atende tratamento di complehidad halto. Nan ta un hospital conoci na vanguardia den operacion di transplante, no solamente na Colombia y na Latino America sino mundialmente.
Nan tin mas cu 10 aña di experiencia riba tereno di transplante y nan a yega di realisa mas cu 500 transplante di higra. Proximamente nan lo inicia transplante cu dunado bibo locual ta algo nobo specialmente den pashentnan cu ta mucha. Actualmente legislacion Colombiano ta permiti cu pashent internacional por pasa den un operacion di transplante pero dunado mester ta un famia directo di dje, ya sea nan mayornan of rumannan.
Mayoria di nan specialistanan ta pertenece na asociacionnan cientifico na Europa y Merca. E ta un institucion cu ta cumpli cu standard di calidad internacional manera esun di Join Comission International. Ademas e Revista America Economia a realisa un ranking di e miho hospitalnan di America Latino y Hospital Pablo Tobón Uribe a wordo ubica den e prome puesto na departamento di Antioquia (Colombia), y tambe den e di tres luga na Colombia y e di nuebe na America Latino.
Nan tin mas cu 120 specialidad y sub –specialidad medico: Oncologia Ortopedia y Trauma; Pediatria; Hepatologia; Urologia; Radiologia y Gastroenterologia. Esakinan ta nan specialidad medico di complehidad halto.
Nan tin dos specialidad nobo: Un di nan ta nan Unidad di Pediatria cu 12 sub – specialidad: Alergologia, genetica pediatrico, Hematologia y Oncologia, hepatologia, Cardiologia, Endocrinologia, Nefrologia, Infectologia, Reumatologia, Neurologia, Neumologia y Gastroenterologia.
E di dos ta: Unidad di Urologia cu ta inclui Urologia, Oncologico, Clinica di Litiasis, Coreccion di Mal formacion, SARS, Medicina Sexual y Maneho de Blaas Neurogenico. El a bisa cu e tratamento nobo denominado SARS (Sacral Anterior RootStimulator) ta un sistema electronico cu ta wordo implanta den e pashent pa hisa nan calidad di bida, specialmente pashentnan cu lesion di celnan of medula pa nan por asumi control boluntario ora cu e kier bay pishi, of bay af y/of tene relacion sexual.
Costo
E costo pa cada specialidad ta relativo, ya cu cada pashent y cada malesa ta diferente. Sinembargo compara cu Merca ta resulta mas barata. Nan costo pa tratamento lo ta alrededor di un 30% mas barata of economico cu Merca. Un cita cu un specialista lo por tin un costo di 60 dollar aproximadamente.
Nan oficina di pashentnan internacional ta brinda ayudo y compañamento personal for di cu nan ta tuma contacto cu e pashent te ora cu e pashent ta bay bek pa nan pais. Nan ta conseha e pashent y su acompañante tocante hotel, conexion turistico, transporte, etc… Tur servicio menciona ta wordo ofrece na tur pashent internacional sin excepcion, no ta importa edad, nacionalidad, rasa, religion, condicion social of economico, etc…
Nan ta percura pa e pashent ta wordo atendi di un manera rapido. Nan ta coordina tur cita medico y administrativo di e pashent. Tambe si ta necesario nan ta tuma contacto directo cu e pashent su specialista of dokter di cas; y tambe cu e seguro di e pashent. Hospital Pablo Tobón Uribe tin aliansa cu e companianan internacional mas importante di seguro. Nan e-mail adres ta: glema@hptu.org.co
