Actualmente un campaña di vacunacion ta andando contra virus di influenza Tipo A y B. E virus aki ta esun responsabel di un cifra grandi di mortalidad anualmente.

E aña aki na luna di april y maart e virus aki su comportacion tabata mas severo. Tanto Europa como Merca a manda señal cu e virus e aña aki tabata causa mas gravedad di loke ta custumbra locual a produci  casonan di morto. Na Aruba tambe a wordo conoci caso di victima pa causa di influenza.

Bon Dia Aruba a tuma contacto cu Departamento di Salubridad Publico (DESPA) su seccion di Malesa Contagioso, caminda nan ta haci un yamado na henter comunidad, pero muy specialmente na e hendenan cu ta traha riba sector di servicio pa publico, y pa comunidad, entre nan Polis, Duana, etc.. pa nan protege nan mes y probecha e campaña di vacunacion  contra  virus di influenza cu ta culmina dia 28 di november awor.

Importancia

“Ta importante pa probecha aworaki y manda un mensahe na tur esunnan den risico, no di salud, pero di por haya e malesa aki, manera polis, Duana y hendenan cu ta traha den crèche, hendenan cu ta cuida y guia muchanan,  pa bay  y tuma bo vacuna”, Dr. Wilmer Salazar a bisa. 

E specialista aki a bisa cu e forma di vacunacion aki ta uno preventivo, ya cu di e forma aki esunnan cu ta traha cu muchanan ta evita cu nan muchanan por a haya e griep.  Otro hende cu ta den factor di riesgo ta e hendenan cu diabetes, pashent cu problema di pulmon, hende mayor cu 65 aña y hendenan di cualkier edad, pero cu un sistema inmunologico hopi abou. Tambe muchanan menor di 2 aña cu ainda no tin un proteccion, y hasta pashent cu HIV cu ta bou tratamento por haya e vacuna aki. Tambe hendenan cu sobrepeso y hende muhe na estado.

Dr. Salazar no kier papia di acto iresponsabel pa esunnan cu no ta aplica e vacuna aki, sino cu e ta un acto di salud, ya cu e hendenan cu no kier haya e vacuna ta su decision personal e ta. Sinembargo e mester corda cu e sufrimento cu abo mes por pasa aden, pero tambe bo famia y comunidad ta un responsabilidad di nos tur. “Mi ta bisa, bay vacuna, ta bo responsabilidad!”, segun Dr. Salazar.

P’esey  e mensahe di Departamento di Salud Publico ta uno cla riba e yamado aki ya cu nan ta traha cu comunidad, y nan ta trahando fuertemente pa combati influenza of griep pa medio di e vacuna.

Vacuna

Dr. Salazar a bisa cu no ta existi meta pa e campaña di vacunacion aki, ya cu si nan lo por vacuna henter nos poblacion lo ta un exito. Si nan por logra pa ehempel 90% di proteccion, e virus di influenza ta keda leu for di nos. Pero e ta lamenta cu e campaña aki ta bayendo regular. “E hendenan no ta consciente di e problematica aki”, el a bisa.

Temporada di fiesta ta na porta y e ta recomenda pa no warda te ultimo ora cu nos ta disfruta di come ayaca y calacuna, etc. cu no por hacie, ya cu bo ta keda ya sea interna den hospital of cera na cas pa causa di influenza cu ta kibra bo curpa cu keintura, calafriu, tosamento y otro sorto di complicacion.  Tin vacuna suficiente, y si nan ta mira cu nan stock ta cabando, nan ta pidi di antemano, asina el a bisa.

Dr. Salazar kende ta un micro-biologo cu experiencia riba tereno di vacuna a bisa cu esaki ta un campaña cu nos poblacion mester probecha. E vacuna ta gratis.  Nan por haya  e aplicacion di vacuna aki cerca bo Dokter di Cas, tambe na departamento di Malesa Contagioso y tambe na Wit Gele Kruis.  E ta reitera cu e vacuna ta un proteccion efectivo contra griep y/of flu. E aplicacion di e vacuna ta produci un tiki di dolor so,  pero nada compara di loke bo por sinti ora cu bo ta wordo afecta cu e virus aki.

Sinembargo no tur hende por haya e vacuna. Si bo ta un persona cu ta sufri di alergia pa webo e no ta recomendabel.  Si un persona a haya den pasado un problema di infeccion of auto inmunologico ta miho pa consulta cu su Doctor di Cas prome.

E persona cu tin cancer por haya e vacuna aki, solamente  cu e vacuna no ta traha mas efectivo. Pero ta recomendabel cu e famia y/of persona cu ta atende of ta rond di un pashent victima di cancer por haya e vacuna aki. 

E vacuna aki ta un proteccion di un aña pa combati e virus di influenza cu ta circulando aworaki.  Dr. Salazar a splica cu e campaña aki ta culmina 28 di november ya cu nan kier vacuna tur hende cu ta den riesgo pa nan keda proteha.  Na december y na januari ta cuminsa e andansa mas pisa di e influenza. E pik di e epidemia of brote di e virus aki cerca e paisnan  bisiña ta cuminsa den e temporada aki.