Ayera mainta durante conferencia di prensa Minister di Asuntonan Economico, Comunicacion y Desaroyo Sostenibel, Geoffrey Wever, conhuntamente cu presidente di Camara di Comercio, sr. Gavril Mansur, a anuncia e Virtual Business Matchmaking entre Aruba y Venezuela.
E meta di e Business Matchmaking Virtual aki, Minister Wever a splica, ta pa trece exportadornan Venezolano, specialmente den e industria di alimentacion y material di construccion, den contacto cu importadornan Arubiano.
Minister Wever a remarca cu e ta mira espacio aworaki pa stimula y facilita e hacimento di negoshi entre Aruba y Venezuela. Esaki no solamente lo ta beneficioso pa e comercinate, pero e lo tin beneficio tambe pa e consumidor cu posiblemente miho prijs, of mas variacion y obtenibilidad di producto.
Anteriormente e aña aki Minister Wever a forma parti di e Trade Mission pa Colombia. El a indica, cu despues di a mira e potencial comercial durante e mision aki, e kierenfoca riba establece y fortalece lasonan comercial cu e paisnan bisiña, pa cual Venezuela, segun e Minister, tambe tin oportunidad
No ta un secreto cu costo di bida na Aruba a aumenta drasticamente y hopi famia ta apenas sobreviviendo cu nan salario. E intento aki, Minister Wever ta señala, ta un manera pa trece mihor prijs pa e cuidadanonan di Aruba.
