Manera Bon Dia 24 a publica ayera a tuma luga un conferencia riba Zika na Renaissance Convention Center cu charlanan interesante riba desaroyonan nobo.
Un di e oradonan tabata e virologo Byron Martina, (di Erasmus Medisch Centrum) cu ta forma parti di un grupo di investigado internacional, paga cu placa di Union Europeo. Nan lo haci 3 investigacion cu tambe ta concentra riba Corsou y sr. Martina ta bisa cu e ta busca colaboracion cu otro islanan manera Aruba.
Pa motibo cu tin hopi informacion saliendo den prensa cu no ta Zika causando e malesa microcefalia (baby) pero e uzo di un tipo di insecticida, Bon Dia 24 a puntra e opinion di sr. Martina riba esaki.
Den e video aki e ta contesta.
Uzo di insecticida y repellent
Bon Dia 24 a puntra GKMB cu ta haci e controlanan na cas y tambe ta fumiga, si e venenonan cu nan ta uza contra e sanguranan, ta peligroso pa salud di hende, animal y of medio ambiente. Segun e instancia e venenonan no ta haci daño y nan continuamente ta adapta e productonan tambe pasobra e sanguranan por bira residente. Te awor GKMB no a ricibi keho. Sinembargo, durante e bishitanan nan ta conseha hende cu tin problema di salud, baby y hende grandi pa keda paden durante e fumigacion of otro spuitmento.
Riba e conferencia di Zika diamars anochi, un persona den publica a menciona cu el a cumpra un producto conteniendo e mesun veneno cu segun un grupo di dokter na Brazil ta causando e crecemento di microcefalia (pues no Zika). Pero segun expertonan internacional e grupo aki no tin prueba cientifico pa substancia esaki.
Departamento di Salud Publico di Aruba ta bisa Bon Dia 24 cu nan lo bay investiga si e insecticida ‘dudoso’ aki realmente ta wordo bendi riba nos isla.
Banda di esaki, e departamento ta enfatisa cu e repellent nan cu bo por haya awor na Aruba no ta malo pa bo salud y nan ta conseha pa uza esaki pa proteha bo contra Zika y otro virusnan.
