(AP) – Un bentana di ticket ta habri atrobe pa biahenan espacial na Virgin Galactic, cu prijs cuminsando na $450mil pa asiento.
E compania di turismo espacial a bisa e siman aki cu ta haciendo progreso den direccion di cuminsa vuelonan pa ganashi proximo aña. Ta bay bende asiento individual, deal di pakete, y vuelonan henter.
Virgin Galactic a anuncia e ofertanan mientras a reporta diahuebs cu a perde $94 miyon den e segundo kwartaal pa gastonan den overhead y benta. E compania a registra entrada di $571mil, apenas suficiente pa cubri un asiento riba un vuelo den futuro.
E logro recien di mas notabel di e compania a yega luna pasa, despues cu e kwartaal a termina, unda cu fundador Richard Branson y cinco compañero di cabina a bula na 86 kilometer riba desierto di New Mexico. CEO Michael Colglazier a bisa cu e compania a reanuda benta diahuebs pa saca bentaha di un aumento den interes di consumidor despues di e vuelo di Branson, cu a derota su rival biyonario Jeff Bezos y su nave Blue Origin pa yega espacio nuebe dia prome.
E compania, basa na Las Cruces, New Mexico, a gana aprobacion regulatorio na juni pa bula cu hende den espacio. Virgin Galactic a bisa cu ‘esnan cu hisa man prome’ ta bay haya prioridad pa reserva asiento, y ta bay crea un otro lista pa clientenan nobo.
E vuelo espacial di e compania ta programa pa fin di september na New Mexico cu e forsa aereo Italiano.
Virgin Galactic a bisa cu a cera e kwartaal cu cash y ekivalente na balor di $553 miyon. E resultadonan a bira conoci despues cu bolsa di balor a cera. E accionnan di e compania a aumenta cu 5% den intercambio despues di ciere.
