(AP) — Virgin Galactic a bisa diaranson cu e Administracion Federal di Aviacion Mericano (FAA) a duna aprobacion pa reanuda lansamentonan despues di un investigacion riba e motibo pakico su astronave a sali di su ruta durante descenso den un vuelo na juli cu fundador Richard Brason abordo.
E compania a bisa cu a ricibi conseho di FAA cu accionnan corectivo proponi pa Virgin Galactic a keda acepta. Ta bay designa un area mas grandi como espacio aereo protegi pa sigura cu tin suficiente espacio pa ‘un variedad di posible trayectorianan di vuelo durante e misionnan di biahe espacial’, segun un declaracion di e compania.
Virgin Galactic a bisa cu ta bay incorpora stapnan adicional den su proceduranan di vuelo pa sigura notificacionnan di mision en bibo na control di trafico aereo di FAA.
CEO Michael Colglazier a bisa cu e compania ta comprometi na seguridad y ta aprecia e revision di FAA. “E updatenan na nos espacio aereo y protocolnan di notificacion di mision en bibo ta bay reforsa nos preparacionnan mientras nos ta move mas cerca di e lansamento comercial di nos experiencia di vuelo espacial”, el a bisa.
Durante e incidente dia 11 di juli, e astronave transportando Branson y cinco empleado di Virgin Galactic a desvia fuera di loke tabata permiti pa trafico di control aereo durante un descenso na un pista na new Mexico. FAA a impone un paro riba vuelonan pendiente di e investigacion.
Virgin Galactic a bisa cu biento na gran altitud a causa e cambio den e vuelo y a insisti cu e dos piloto a responde adecuadamente. E compania a bisa cu e nave no a biaha riba centronan di poblacion of causa peliger pa publico.
