Sao Paulo ta e ciudad mas grandi di Brasil y diabierna a manece sin transporte publico y cu blokeo riba algun caminda y caretera principal, den un huelga general, impulsa pa sindicatonan contra reforma economico, cu a ser introduci pa presidente di Brasil, Michel Temer. Autoridad a confirma 16 hende deteni, pa motibo di cu nan a altera orden publico.
Diabierna marduga hopi manifestante a pone palo cu tire riba caminda principal, cu ta duna acceso na aeropuerto internacional di Guarulhos, na Sao Paulo y nan a cende candela, cu e obhetivo di evita e paso di vehiculo. E pista a ser libera pa polis cu a yega y a enfrenta algun persona cu tabata participa den e protesta, y cu a ser organisa pa sindicato di aviacion y movimento di trahador ‘sin dak’ (MTST), un di e gruponan social mas activo di Brasil. E grupo aki ta solicita un aumento di cas di interes social.
Otro caretera importante a keda paralisa den e estado tambe ta La Dutra, un di principal careteranan di Brasil y cu ta uni Sao Paulo cu Rio de Janeiro. E metro di Sao Paulo tabata traha parcialmente, pasobra mayoria di conductor di metro a participa den e protesta. Solamente un linea tabata traha normal.
Algun trahador no a bay traha pasobra nan tabatin dificultad cu transporte publico. Algun empresa a contrata un bus completo pa asina por recoge nan trahadornan.E huelga cu a ser convoca ta coincidi cu e aprobacion di un reforma laboral den Camara di diputado, cu lo habri e porta pa costo laboral mas abao, como tambe duna validez di ley na convenio colectivo y lo duna un golpi financiero fuerte na e sindicatonan eliminando e contribucion obligatorio duna te awor segun ley. E protesta tabata pa reclama tambe nan posicion contra otro reforma na Brasil, y cu awor ta den Congreso. E reforma di sistema di pension ta haya apoyo di banda di empresario y como tambe rechaso di parti di sindicato.
