(El Pais) – Violencia ta birando pio na final di campaña electoral na Mexico, den ultimo dianan e pais a registra atakenan contra candidatonan y personanan rond di nan, caso di asesornan, suplentenan y integrantenan di ekipo di campaña.
Dialuna y diamars di e siman aki, criminalnan a comete atakenan na Puebla, Morelos, Estado di Mexico, Jalisco y Tamaulipas, algun di nan a laga atras mortonan y diamars mes Gobierno federal a purba di rebaha e preocupacion, señalando cu tur e luna aki di campaña 22 persona a ser asesina, entre candidatonan, precandidato y aspirante, presidente Andres Manuel Lopez Obrador a señala e importancia di tin bon datonan pa duna e idea cu violencia ta algo general.
Un di e atakenan mas relevante ta esun cu a caba cu e bida di Ricardo Arizmendi, suplente di e candidato di coalicion PRI-PAN-PRD na alcaldia di Cuautla, na Morelos. Arizmendi ken tabata lider di comerciantenan den un plasa comercial na e municipio, a ser ataca cu tironan na su negoshi, oranan despues di publica un video pidiendo e voto pa e candidato di coalicion, Jesus Corona. Den e video, Arizmendia tabata señala e preocupacion di e poblacion pa inseguridad, Morelos ta un di regionnan di e pais na unda violencia a aumenta hopi den dos ultimo aña.
Tambe otro atake a laga atras dos morto ora colaboradornan di un aspirante a alcansa e auto cu nan tabata coriendo y nan a muri debi na tironan loke ta coresponde na un guera entre Morena y Partido Verde, aliadonan na escala nacional, ambos partido ta mantene un bataya den e localidad di Chiapas.
Na Puebla, criminalnan a ataca cu tironan e auto di un candidato di Movimiento Ciudadano pa alcaldia di Tehuacan, Juan Sandoval. E aspirante, cu tabata hunto su auto, a logra drenta su cas di campana y no a resulta herido. Atacantenan a lage un mensahe di su auto, referiendo na su enfrentamento cu Morena. Den ultimo simannan, Sandoval ta bin criticando ekipo di campaña di Morena pa presunto iregularidadnan.
Otro atakenan a tuma luga na Jalisco, na unda criminalnan a dispara contra e cas di e candidato di Morena di alcaldia di Encarnacion de Diaz, Gilberto Palomar, lagando Sandoval herido y na Tamaulipas, un persona a ataca y asesina cu un cuchiu e coordinador di campaña di aspirante di PAN na alcaldia di Padilla.
Segun un ultimo rapport di violencia electoral di e consultor Integralia, publica na comienso di mei, Mexico ta conta cu 250 victima di violencia politico for di september 2023, Guerrero, Chiapas y Michoacan ta e estadonan cu mas atake a registra den ultimo lunanan, hasta mei Integralia a conta 29 candidato of aspirante asesina for di september 2023.
Mañan 2 di juni lo tuma luga eleccion federal na Mexico pa presidencia di Republica, ta trata di eleccion di mas grandi cu e pais aki a tene pa e cantidad di funcionnan cu ta den wega, cu mas di 20,000 na nivel nacional y local.
