Aunke ta existi avancenan grandi pa loke ta trata empoderamento di hende muhe, violencia relacional ta sigui keda latente den comunidad.

Miles di hende muhe ta wordo maltrata y asesina den man di un agresor pa cada aña, violencia no ta mustra solamente den heridanan fisico, sino cu tambe ta implica un marca profundo den nan nivel psicologico.

Sindroma di Hende Muhe Maltrata “Battered Woman Syndrome” ta e patronchi di sintomanan y señalnan cu hende muhe ta sufri despues di ta victima di abuso psicologico, sexual of fisico, ora su agresor ta eherce poder y control riba dje, e ta capaz di manipul’e pa di e forma ey e por bisa y haci loke su victima kier, despreciando su derechonan y sentimentonan.

E sindroma aki ta constitui pa seis criterio: e muhe ta haya recuerdonan perturbador di un acontecimento traumatico, nivel halto di ansiedad, comportacion cu ta indica evita emocion y di renuncia cu sentimento di depresion, relacion interpersonal conflictivo debi na e poder y medidanan di control cu e agresor tin riba dje, dolornan fisico, alteracion di e imagen fisico y problemanan sexual.

Hende muhe cu ta sufri di e sindroma aki ta kere cu e comportacion negativo y cu su manera di combati no lo logra pone fin na e abuso di su agresor, ta p’esey cu e ta stop di pone fin na e abuso y na su luga e ta desaroya strategianan defensivo, cu e unico fin di biba na salvo pero cu e posibilidad cu e lo continua soportando abuso.

Psicologonan a identifica cu ta existi diferente tipo di agresor: esunnan cu ta utilisa violencia como forma di control, esunnan cu ta padece un malesa mental cu ta interactua cu su comportacion agresivo y esunnan cu tin un personalidad anti-social, e ultimo aki a wordo dividi den dos clase: forma ‘pitbull’ cu ta e tipo di agresor cu ora e ta rabia no ta laga su victima bay y conforme cu esey e ta eherce violencia, y e forma ‘cobra’ cu ora e agresor tin mas rabia e ta indica mas calma pa asina mantene e control y ta rechasa e muhe pa lag’e sinti humilia.

Esaki ta nifica cu no tin un perfil concreto di un maltratador, nan ta utilisa hopi forma di manipulacion como aislamento, e ta impone su mesun reglanan, ta un persona jaloers y ta menasa.

Mayoria di hende muhe cu ta victima di violencia ta sinti rabia di nan mesun curpa, debi na autoestima hopi abao cu nan ta experimenta y e dificultad di nan por protege su mes, mayoria di biaha nan ta sinti su mes cansa y impotente, ademas di sufri un constante situacion di panico, tur esaki tin como consecuencia un serie di sintomanan depresivo y di mal beis, depresion, ansiedad, ideanan di mata su curpa, ademas di problemanan pa drumi como insomnio.

Na Aruba nos por mira un di e tantisimo casonan di abuso relacional cu tabatin como consecuencia e morto di dos angelito, den caso aki, nan mama di nomber Richaila F. segun e sentencia di Corte den caso aki, a indica cu e tabata sufri di e sindrome di Hende Muhe Maltrata:

“Tanto psikiatra como psicologo a informa cu e mama tabatin e sindrome di Muhe Maltrata “Battered Woman Syndrome” y conhuntamente tabata sufri di depresion pisa, pa via di su impotencia el a desaroya e sensacion cu e no por a haci nada, debi na su miedo e no por a saca su yiunan di e situacion peligroso aki y protege nan lo suficiente, tambe a indica cu e tabatin un actitud relaha y no tabata preocupa su mes pa hopi cos”, e documento a señala.

Den e caso di Richaila tambe a busca un opinion di otro psikiatra di Corsou unda den su rapport el a señala cu “e mama no tabata sufri di un trastorno psikiatrico stricto y cu e tabata victima di violencia relacional grave y no por atribui e delito na dje”, el a cumpli cu un castigo di tres aña di prizon.

Di otro banda, segun relato di aña 2020 di Fundacion Respaldo, tanto gobierno como SZA, UO AZV y psikiatranan di Aruba a establece Fundacion Respaldo na 2017 pa motibo cu e demanda di atencion pa salud mental tabata hopi mas grandi cu e oferta di atencion. Na e momento ey, Respaldo a duplica su capacidad cu 70% mas di empleado y 35% mas di presupuesto.

Desafortunadamente, oferta di tratamento na Aruba na e momento ey ainda tabata hopi abao di e demanda di atencion existente y a pesar di e crecemento cu algun fundacionnan como SPD, FMMA y Respaldo a experimenta, e dos tercio di e demanda di atencion na Aruba te ainda tabata insatisfactorio.

Pandemia Covid-19 a trece hopi reto den tur area loke ta nifica cu den area di salud a pone un carga adicional significativo den esaki, ainda tin hopi hende cu no a recupera nan trabao pa via di e pandemia loke ta un evento traumatico cu ta conduci na un necesidad potencial di salud mental, ademas aislamento tambe a contribui na esaki unda cu hende no tabata kier sali di nan cas pa temor di haya un boet of pa evita di wordo contagia di e virus, un presion adicional riba personanan y famianan.

Esaki tambe a conduci na aumento di abuso di substancianan, violencia, depresion y otro factornan, ta p’esey cu den aña 2020 a wordo realisa un encuesta entre tur e dokter general na Aruba.

E dokter general promedio a calcula cu mas di 12.000 residente na Aruba tabatin mester di apoyo profesional pa nan salud mental na e momento ey.