Un grupo di preso a secuestra tres guardia di siguridad na un prizon di estado Mexicano Nuevo Leon. E suceso aki a produci varios candela y un conflicto entre 250 preso cu a caba cu e uzo di forsa letal di banda di autoridadnan den e prizon. E suceso aki a laga 13 morto y 26 persona cu a wordo herida.
E bringamento a cuminsa na prizon di Cadereyta, y te na cierto momento henter e situacion tabata bao control di autoridadnan. Sinembargo, mas laat e problema a cuminsa atrobe ora cu un grupo di prizonero a cuminsa cende varios obheto na candela, cu a causa dos columna di huma preto, y tabata visibel na varios kilometer di distancia. Den e candela aki a muri e prome prizonero.
“El a wordo asesina y despues kima,” esaki ta locual Aldo Fasci, vocero di Siguridad di Nuevo Leon a splica. E cuerpo di siguridad aki a bisa cu autoridadnan tabata purba di haya e curpa lo mas lihe posibel, pa motibo cu no tabatin claridad riba e forma di su fayecimento, pa motibo cu e suceso no tabata riba e video di siguridad.
Den e suceso cu a sigui, e grupo di prizonero a secuestra tres guardia di siguridad, y asina a cuminsa un protesta contra dirigentenan di e prizon. Prizoneronan a purba di combersa cu autoridadnan, pero e dialogo no tabata tin resultado positivo, y esaki a finalisa sin un acuerdo, y pa tal motibo tropanan di siguridad di Mexico a drenta den e prizon, e funcionario a splica.
E grupo polis a cuminsa yega cerca di e prizoneronan, y e prizoneronan a cuminsa ataca e grupo di polis, un polis a wordo herida na su pulmon. E prizoneronan a ataca cu piedra y obheto continuamente.
E uzo di forsa no letal no tabata suficiente, pasobra den e di dos etapa di e motin tabata participa mas di 250 prizonero, Fasci a bisa.
Finalmente autoridad mester a uza forsa letal pa asina evita cu e prizoneronan lo a asesina guardia di siguridad y otro prizoneronan cu tabata secuestra. Te diahuebs tabata tin un cantidad di 13 prizonero cu a fayece . E uzo di forsa letal ta wordo hustifica pa articulo 17 di e Codigo Penal di Mexico.
