E caso di violencia domestico of violencia den famia ta sigui tuma luga durante e dianan aki di shelter in place y toque de queda.
Directora di departamento di Asunto Social (DAS), Sra. Glenda Hernandez a bisa cu nan ta hayando mas señalnan cu e casonan aki ta aumentando den seno di famia.
Pa e departamento aki esaki ta un señal cu nos mester ta hopi alerta ariba dje. “Locual nos ta ripara y remarca ta pasenshi y tolerancia di un pa otro no ta hopi desaroya,” el a bisa.
Hernandez a indica cu e no kier generalisa, pero desafortunadamente esey nan por mira den nos propio hendenan. E situacion aki ta demanda e reto pa sinta mas hunto na cas, y tambe cu e muchanan na cas, pero ta importante pa mantene mas harmonia posibel.
Igualmente e ta haya cu tin hopi famia cu ta drechando nan relacion durante e temporada aki. Nan ta haci hopi cosnan hunto y esaki ta un bon señal. Aunke bo ta keda humano y tin biaha bo por slip. Pero nan por wak e famianan cu ta purba di mantene uni ta purba di drecha relacion, y esey ta bayendo bon.
Hernandez a indica cu tambe tin famia cu ta bibando den tension constante, y practicamente ‘nan ta bibando un fierno completo na cas’. Esaki ta e caso di e relacionnan cu e ta cualifica di ‘hopi toxico’, caminda e muchanan ta aden. Den e caso aki e pareha ta haya nan mes obliga pa keda hunto y biba hunto cu otro. Esaki ta trece cune cu hopi biaha e tension aki ta exalta y ta resulta den violencia na cas of violencia den famia.
E ta lamenta cu den e casonan di violencia domestico hopi biaha e muchanan ta bira e victima di e tipo di violencia aki. Directora di DAS a bisa cu nan ta hopi activo riba e tereno ey. Den sentido cu nan ta laga scolnan yama cas check con ta bayendo cu e mucha, y wak con e situacion ta bayendo den cas di e menor. “Nos ta monitor e relacion aki,” el a declara.
Sinembargo e ta reconoce cu pa DAS ta keda un reto hopi grandi, con nos famianan por haci y biba hunto un tempo asina largo, sin cu nan ta cay den violencia na cas.
