Un grupo di persona consistiendo di famia, amigo y ciclistanan a bini hunto diadomingo anochi pa tene un vigilia na memoria di Chaim de L’Isle. E encuentro a tuma luga na e cruzada di Alhambra Casino y Irausquin Boulevard cu ta e punto caminda e hoben a sufri e accidente den cual el a perde su bida.
Na un manera spontaneo kier a recorda e bida di e 10 victima fatal di trafico pa 2018, pero trece conscientisacion riba seguridad vial. Specificamente ciclistanan ta sinti nan mes insigur den e trafico local y ta pidi automobilistanan pa comparti e caminda respetando e reglanan di trafico.
Un di e ciclistanan cu a tuma iniciativa pa tene e homenahe postumo a hiba palabra durante e transmision en bibo di 24ora.com bisando cu nan no tey pa “punta dede riba e automobilista, ni riba e ciclista; pero si ta pidi pa tene cuenta cu ciclistanan riba caminda pasobra e por ta bo yiu of bo ruman.”
Esnan presente, den su mayoria bisti na blanco, a coloca un bais simbolico cu a spuit na e mesun color y riba dje a pone belanan cu a cende na memoria di Chaim. Tambe a tene 1 minuut di silencio.
