(AP) – Gobierno Mericano su agencia di salud principal no ta cumpliendo cu su responsabilidadnan den lidera e respuesta nacional pa cu emergencianan di salud publico incluyendo e pandemia di coronavirus, e desasternan extremo relaciona cu clima y te hasta posibel atakenan bioterorista, un vigilante federal a publica.
Government Accountability Office a bisa cu nan lo categorisa e Health and Human Services Department su liderazgo y coordinacion di emergencianan di salud publico como un area di “riesgo halto” pa e gobierno. Mientras cu e categorisacion aki no ta carga consecuencia inmediato, e ta informa e Congreso cu mester presta mas atencion di cerca na e agencia su operacionnan.
“Fayonan persistente” cu ta keda tuma luga na HHS “a stroba e nacion su respuesta na e pandemia actual di COVID-19 y un variedad di menasanan den pasado,” GAO a bisa den nan reportahe. “Si laga e fayonan aki sigui tuma luga, esaki lo sigui stroba e nacion su habilidad di prepara pa y efectivamente responde na menasanan den futuro.”
E fayonan ta inclui maneho di e cadena di suministro medico, coordinacion cu agencianan federal y estatal y provee comunicacion cla y consistente cu e publico y e comunidad di cuido di salud, GAO a declara.
E reportahe aki ta parti di GAO su evaluacion di e Gobierno su respuesta na e pandemia. El a ser publica na mesun momento cu miembronan di Senado di ambos partido a trece leglisacionnan nobo e siman aki tocante investigacionnan di cerca tocante e pandemia y un resumen di e trabao di HHS.
