(AP) – Agencia Secret Service a kita mensahenan di texto manda y ricibi relaciona cu e atake cu a tuma luga dia 6 di januari 2021 na U.S Capitol hasta despues cu un inspector general a pidi pa esakinan como parti di un investigacion tocante e atake, segun vigilante di Gobierno.
Department of Homeland Security Office of Inspector General, den un carta obteni pa The Associated Press, el a bisa cu e mensahenan manda entre dia 5 di januari y 6 di januari a ser kita “como parti di un programa pa reemplasa dispositivo.” Esaki a tuma luga despues cu e oficina di e vigilante a pidi recordnan di e comunicacionnan electronico entre agentenan como parti di su investigacion relaciona cu e eventonan cu a tuma luga rond di e atake aki, e carta a splica.
Adicionalmente, empleadonan di Homeland Security a ricibi instruccion cual a dicta cu no por provee e recordnan na e inspector general y cu cualkier record cu kier duna mester keda revisa pa e abogadonan di DHS.
“E reviso aki a causa atrasonan di simannan largo pa obtene e recordnan y a crea hopi confusion tocante e recordnan y si esaki a ser produci,” e carta a sigui conta, cual a ser manda pa lidernan di e House and Senate Homeland Security Commitee.
Vocero di Secret Service Anthony Guglielmi a opone na e carta diahuebs anochi bisando cu “e insinuacion cu Secret Service cu intencion maligno a kita e mensahenan despues di e peticion ta falso. De hecho, Secret Service ta cooperando cu OIG completamente den tur aspecto, sea cu esaki ta via di interview, documentonan, e0mail of mensahenan di texto.”
El a bisa tambe cu Secret Service a cuminsa reset nan dispositivonan mobil na e ahustenan di fabrica den januari 2021 como “parti di un migracion di sistema di 3 luna cu ya caba tabata plania di antemano” y durante e proceso aki a perde algun dato.
E inspector general a pidi e record di comunicacionnan electronico dia 26 di februari, “despues cu e migracion aki a cuminsa caba,” Guglielmi a comenta.
