Un vigilante di privacidad Aleman a bisa diahuebs cu ta dunando boet di 35.3 miyon euro na e minorista di paña H&M, despues cu a haya cu e compania tabata spiona riba algun di su empleadonan na Alemania.
Comisionadonan di proteccion di data di Hamburg a bisa den un declaracion cu e compania Sueco a colecta informacion priva di su empleadonan na un centro di servicio pa cliente na Nuremberg, ‘variando entre detayenan inofensivo te cu problema familiar y creencia religioso’.
A warda e informacion den un drive accesibel te cu 50 manager y tabata ser ‘usa, entre otro, pa obtene un perfil detaya di empleadonan pa medida- y decisionnan tocante nan empleo’.
Comisionado di proteccion di data, Johannes Caspar, a bisa cu ‘e combinacion di colecta detayenan di nan bida priva y registracion di nan actividadnan a conduci na un abuso particularmente intensivo riba derechonan civil di empleadonan’.
A descubri e violacion di privacidad despues cu e data a bira visibel momentaneamente na tur hende riba e red di e compania, resultando den reportenan den noticia tocante e compilacion di informacion.
H&M a bisa den un declaracion cu e practica na Nuremberg no ta coresponde na guia di e compania, pero cu sinembargo ta tuma responsabilidad completo, y a pidi disculpa sin reserva na e empleadonan. E compania a bisa cu lo examina e multa cu a ricibi.
Casper a acepta e decision di H&M pa paga compensacion na empleadonan na e centro di servicio di Nuremberg y tuma medida pa preveni violacion di privacidad den futuro, bisando cu e stapnan ‘ta mustra e intencion di duna e empleadonan e respet y e apreciacion cu nan ta merece como trahadonan depediente den nan trabao diario pa e compania’.
