Vidmara Geerman di proyecto Ban Serio Aruba, ‘Isla ta hayando hopi rosamento, construccion ta aumenta y no ta bin ni un mata nobo’

Humanidad tin cu asumi accion cu problemanan ambiental, ya cu ta esun cu ta hunga un rol hopi importante riba e keintamento di planeta, a traves di contaminacion ambiental, por ehempel. Esaki ta genera otro problemanan manera den biento, awa, tera, planta y bestianan. P’esey, ta fundamental pa awendia hende desaroya y fomenta strategianan pa trata di disminui e crisis ecologico cu ta pone den riesgo e bida y stabilidad di planeta.

Den sentido aki, e plantanan ta un solucion pa combati e problemanan ambiental y logra un ekilibrio ecologico den e planeta. Nan ta lucha contra hopi problemanan di medio ambiente y entre nan esun cu ta cabando cu e calidad di oxigeno di planeta.

Durante un entrevista special cu Bon Dia Aruba a haci cu Vidmara Geerman, coordinador di proyecto Ban Serio di ATA (Aruba Tourism Authority), el a conta cu e proyecto ta consisti di cuatro topico e cual ta cultura, medio ambiente, hospitalidad y siguridad. Cada temporada nan ta selecta un topico y nan ta papia over di esey.

Geerman a señala cu aworaki nan ta anunciando e reto ‘Ban Planta Mata’, cu e mes a bisa cu a bin door di e feedback cu nan a haya di comunidad mes. Pero di mesun manera el a manifesta cu nan a haya distinto opinionnan y keho, por ehempel, cu medio ambiente di Aruba no ta bon, pa motibo cu na e momentonan aki henter e isla ta hayando hopi rosamento, e proyectonan di construccion ta aumenta dia pa dia y no ta bin ni un mata nobo.

“Esaki ta algo hopi comun y nos a pensa kico nos por haci pa cuminsa busca un solucion”, Geerman a declara. Tambe el a haci referencia cu nan no ta esunnan cu por haci un cambio riba nan mes, pero si por haci algo tocante falta di mata pa sombra, pa fruta, pa e mesun oxigeno cu nan ta duna.

“Nos por cuminsa planta den nos mesun cas, den nos mesun bario, papia cu otro y haci algo”, esey ta e idea di Ban Planta Mata di e proyecto Ban Serio.

Di mesun manera, Geerman a specifica cu tin diferente instancia y organisacion di gobierno y boluntario cu tin iniciativa pa e comunidad sa cua mata ta di Aruba, cua mata ta proteha. Santa Rosa ta un di nan, cu tin experiencia cu matanan y por guia e hendenan con por cuida y proteha.

Tocante rednan social, Geerman a comenta cu tabatin comentarionan di e mesun comunidad con por haci pa cuida e medio ambiente. “E plataforma di Ban Serio tin 7.000 siguido, si e personanan ey ta planta un mata nos por haci un diferencia.”

Geerman a expresa cu e topico di medio ambiente ta ricibi hopi atencion den dianan aki, pa motibo di e Asamblea General di Nacionnan Uni (ONU) na New York. Accion contra cambio climatico tabata un topico riba agenda, specialmente cu un mucha muhe di 16 aña di Suecia, cu e nomber Greta Thunberg y cu a converti den un lider na lucha contra cambio climatico.

“Hopi hende di biaha no ta pensa pa haci algo, e mayoria ta keha”, Geerman a bisa, tambe a expresa cu ‘si miles di hende cuminsa planta mata den nan cura, nos por drecha nos calidad di aire’.

Loke ademas Geerman a expresa ta cu hende mester cuminsa cambia nan manera di pensa y actua. E como coordinador di proyecto ta consciente di loke e comunidad ta bisa, ta pidi y nan kehonan y nan tin rason door cu companianan y gobierno ta construi riba hopi terenonan. Pero, y awo kico?

Tocante e campaña el a comenta cu hopi personanan a haya interes riba di dje y tambe a señala cu si mas instancianan of grupo di boluntarionan bira envolvi riba dje ta miho. Tambe ta existi algun instancia cu tin informacion pero mester haci mas publico, informa comunidad mas y asina mas hende por haci’e.

Te e momentonan aki, el a informa cu e campaña ta duna e idea pa motiva hende pa haci’e, pero nan no tin planea te ainda pa haci un evento hunto cu organisacionnan encarga di esaki.

Di loke ta trata e ‘Sustainable Development Goals’ na Aruba, Geerman a trece dilanti cu hopi organisacion a implementa nan y esey ta bon, pa motibo cu e enfoke ta keda centra riba e mesun topiconan. Pero tambe a agrega cu ‘nos tur por haci hopi, nos por haci mas di loke nos mes ta pensa. Pero mi no ta wak con e ta wordo comunica, hopi biaha e informacion no ta aali afo’ el a finalisa.