ORANJESTAD – Ban Serio #ReconoceBoImpacto ta un campaña di conscientisacion cu ta enfoca riba cada comportacion cu tin un impacto. Ademas di esey, ta trata di inspira y facilita cambionan den e comportacion y accion colectivo, pa un desaroyo duradero pa Aruba.

Durante un entrevista con Bon Dia Aruba a haci cu Vidmara Geerman- coordinador di proyecto, y Isha Tapias-Kock- coordinador specialista, nan a splica con e necesidad di crea un proyecto di conscientisacion pa comunidad di Aruba a nace, como un plan strategico DDP di Aruba Tourism Authority (ATA) na september di 2018.

Geerman a comenta cu esaki ta un plan pa futuro di cuater aña, unda nan ta haci un investigacion di kico e comunidad local kier, kico stakeholders di turismo kier pa Aruba desaroya den dje, y for di esey e puntonan cu e campaña Ban Serio ta toca ta Medio Ambiente, Hospitalidad, Siguridad y Cultura.

Segun Geerman, e areanan ey ta esunnan cu ta falta di mas atencion, den opinion di stakeholders di turismo y e comunidad local.

E idea ta pa nan por mustra tur hende nan mes responsabilidad individual. E ta keda na cada persona tambe, tur escogencianan hunto ta haci cambionan y efectonan cu hopi biaha hende no ta para keto cu e consecuencianan, y esey tin un efecto hopi grandi.

Di mesun manera, Geerman a duna di conoce cu den e puntonan ey, nan a purba di sigui e temporadanan local pa nan mira kico ta sosodiendo desde september cu e proyecto a cuminsa, y e ora ey nan a asisti pa Art Fair pa papia di e varios cultura cu Aruba tin, y tambe di siguridad, pa motibo cu den dianan ey tin hopi bebemento pa fiestanan di Pasco.

Durante Art Fair, nan a pidi pa hende trece sushi pa despues recicla esaki, pa wak e proceso di reconversion fisico di algo y con despues lo por reutilisa.

Den temporada di carnaval, e iniciativa tabata trata pa kita e cupnan di e hende y duna un cup reusabel. E biaha aki segun Tapias-Kock a duna un oportunidad mas grandi pa hende no uza cups di un solo uzo, y pa nan uza un cup reausabel den 4 parada grandi di Carnaval, y asina nan a haci un ehercicio cu cada hende di salba di 20 cups den e 4 parada di casi 10.000 hende. “Eynan hende por a wak con e monster di sushedad ta cuminsa crece”, Tapias-Kock a señala.

Durante e temporada di campamento, el a manifesta cu nan a haci e Pop Up Beach Expo durante tres dia, pa motibo cu e temporada ey e hendenan ta bay disfruta e dianan liber riba beach. E topico tabata trata di sushedad cerca di lama, e obhetonan cu e persona ta hiba pa lama y loke nan ta trece bek, e leynan cu ta existi, y asina por comunica di un manera original kico ta e efectonan cu esey ta ocasiona.

Den e Pop Up Beach Expo, nan a haya 50 hemchi cu desperdicio di plastic colecta durante cinco ora riba e costanan di Aruba.

Tambe nan a conseha comunidad pa haci menos uzo di plastic, como por ehempel un boter di plastic cu awa, e consumo di esaki un biaha pa siman a duna un resultado di 3.120 florin pa cada aña, compara cu e inversion di un boter re usabel cu tin un prijs di 15 pa 60 florin aproximadamente.

“Producto desechabel ta mas caro den un aña cu si bo ta cumpra un producto reusabel” Geerman a sigura.

Riba e proyecto di Ban Serio, nan a confirma cu lo sigui durante e aña aki, y e proximo topico ta trata di hospitalidad. Lo haci un show cu lo estrena e prome episodio online riba Facebook, y pa final di aña, Tapias-Kock a comenta cu lo haci otro aspecto mas tangibel pa comunidad.

Pa finalisa, nan a recomenda pa comunidad para keto y pensa riba tur e sushedad cu ta produci pa dia, y cuminsa uza productonan reusabel. Tambe nan a bisa pa esunnan cu ta gusta bay lama, pa haci fiesta y nan ta pone blaas riba e palonan, sin cu nan sa cu ta un material cu tambe ta afecta lama y bestianan.